Nongpoh, Nailar 23: Halor ka jingdonkam kaba kyrkieh jong ka thaiñ Byrnihat ban ïoh noh ïa ka jaka kaba paka ban tei kum ka jaka theh niut lane ka Solid Waste Management, ka seng Federation of Khasi Jaintia & Garo People (FKJGP) ha ryngkat ka ophis u Syiem ka Raid Marwet ki la shimkhia ban wad noh ïa ka jaka ha ka thaiñ bad la sdang ruh ban jurip ïa ka jaka kaban lah pyndonkam kum ka jaka theh niut kaba paka.
Ka thaiñ Byrnihat hapoh ka Raid Marwet ka la donkam ïa ka jaka theh niut kaba paka ban tehlakam ia ka jingbret pathar ïa ki jakhlia bad ruh ban pynneh pynsah ïa ka jingkhuid jingsuba ha kane ka thaiñ.
Ka FKJGP-North Khasi Hills kaba iohi ia kane ka jingdonkam, kala leit ban iakynduh ïa u Syiem ka Raid Marwet Bah Ken Syiem ban ïa phylliew jingmut halor kane ka kam.
Ka FKJGP ryngkat u Syiem ka Raid Marwet hynne ka sngi ba-ar kila leit ban jurip ia ki katto katne ki jaka kiba don hapoh ka Raid Marwet ban pynthikna ba kine ki jaka kim dei kiba la don trai lane kiba lait ruh n aka jingdon jong ki shnong ki thaw.
Haba iakren bad u nongthoh khubor, u President ka FKJGP Bah Lumlang Mawnai, u la ïathuh ba na ka liang ka seng ka dap shisha ïa ka jingsngewkhia kaba jur halor ka jingbym don ka jaka theh niut kaba paka hapoh Byrnihat kaba la buh jingeh shikatdei ïa ki paidbah nongshong shnong ban bret ïa ki jakhlia ba mih man ka sngi, kaba la pynlong ruh ia ki paidbah ban bret pathar ia ki jakhlia wat ha ki lynti ki synkien bad wat harud u surok bah National Highway-6.
U Paiem Ken Syiem, u la ïathuh, ba na ka liang ka ophis ka Raid ka long kaba kloi ban kit lang ïa ka jingkitkhlieh na ka bynta ban pynïoh ïa ka jaka theh niut kaba paka na ka bynta ka thain Byrnihat.
Haba kylli, u Paiem ula ong ba ka jingjurip hynne ka sngi kam pat lah ban shim rai namar la lap ba kine ki jaka kiba don hapoh ka Raid ki dei kiba la pyndonkam da ki nongrep bad ruh ka jingdon jong ka wah.
“Ngin sa nang wad ia ka jaka bad shen ngin sa lah ban shim rai noh ia kane ka kam” ula ong.
