Kohima, K’lyngkot 24 : Ka Seng Eastern Nagaland People’s Organisation (ENPO) ka la shim ia ka rai ban iashim bynta ha kane ka ilekshon assembly ka ban wan ha Nagaland hadien ka jingialang kaba shong kyrkieh.
Kham hashwa, ka ENPO kaba dei ka kynhun seng ba hakhliehduh jong ki trai shnong riewlum ka Nagaland ka la shim ia ka rai ban ym iashim bynta ha kane ka ilekshon assembly lada ka jingdawa ka jong ka ban pynioh la ka jong ka jylla kam urlong shwa ka ilekshon.
Ha ka 22 tarik mynta u bnai ka ENPO ka la pynlong ia ka jingialang kaba kyrkieh ha kaba ka la shim ia ka rai ban iashim bynta ha kane ka ilekshon assembly.Ha ryngkat ka ENPO, kiba bun kiwei pat ki kynhun seng ki Naga ki la shim ia ka rai ban kiar ban iashim bynta ha kane ka ilekshon assembly ha Nagaland, hynrei la iohi ba ia kane ka mat la lah ban weng noh.
Ha kawei pat ka bynta, ki party sain hima ba kongsan ka Nagaland ki la pynkhreh ha kaba iadei bad ka jingpynlong ia ki rally sain hima ban khring ia ki paid nongthep vote.
Kiba bun ki kynhun seng bapher bapher ki la kyntu ia ka sorkar pdeng na ka bynta ban weng ia ki jingeh sain hima jong ki paid Naga hashwa kane ka ilekshon assembly ilekshon.Dang shen ki dkhot jong ka ENPO ki la iakynduh ia ki heh ka MHA ba la lamkhmat da ka AK Mishra.
Ha kawei pat ka bynta, na ka liang jong ka Konyak Union (KU) ka la shim ia ka rai ban kiar ban iashim bynta ha kane ka ilekshon assembly.Ka seng ka la shim ruh ia ka rai ban weng kam shyrta ia kito ki briew kila leit thep kyrteng na ka bynta ban iashim bynta ha kane ka ilekshon na ka khydew ka shyiap jong ki jaidbynriew Konyak kiba dei ki trai shnong riewlum ka jylla.
Na ka liang u Myntri Rangbah ka jylla u Neiphiu Rio dang shen u la ong ba ka sorkar jylla kan ym ailad satia halor kano kano ka jingpynthut ha kaba iadei bad ki riti synshar khadar jong ka ri.
Ka Nagaland ka don 60 tylli ki seat ha kaba ka Eastern Nagaland ka don 20 tylli ki seat.Ka jingiathep vote sha ka ilekshon assembly ha Nagaland kan long ha ka 27 tarik u Rymphang u ban wan.
