Shim mukotduma ka MHRC pyrshah iaka Civil Hospital na ka aksiden kali ki samla Pule ha NEHU

Shillong, Naiwieng 25 : Ka Meghalaya Human Rights Commission (MHRC) kala shim suo motu case pyrshah ia ka Shillong Civil Hospital namar ka jingjia shah tynrah kali ki arngut ki samla pule ha NEHU dang shen.

Ia kane ka mukotduma la shim halor ka khubor ba mih ha kawei ka kot khubor ba kynnoh ba ki bahaiing hasem bad ki samla pule kila kynnoh ba ki nongtrei ka Civil Hospital, kila khein sting ban ai jingsumar ia kine ki samla pule ba mynsaw haduh ba iwei ila phlei snam haduh jan dap kynta.

Namar kane, ia kine ki samla pule la pynkynriah noh sha Nazareth Hospital
.
Ka Commission kala phah notice sha ka Director of Health Services (MI) ka Sorkar Jylla, ba bthah ba kan pynlong mardor ia ka jingtohkit bad ban aiti ia ka kaiphod jingtohkit sha ka Commission ha lane shuwa ka 7 tarik Kyllalyngkot 2026.

Ka dei ha ka 18 tarik Naiwieng, arngut ki samla pule ka tnad Chemistry ka NEHU, kila shah rat ha ka kali katba ki dang iaid lynti ha phyllaw jong ka NEHU ban mih sha Gate No 2.
Kane ka kali kaba dei ka Maruti Car la niah da u Security Guard uba trei sha NEIGRIHMS hynrei uba sah ha barrack ka kompani kaba don ha NEHU.

Kine ki samla ki kyrteng ka samla Daritngen Pohdukhei bad ka samla Stephanie Shadap.
Ki Pulit kila pynngat case ia une u nongniah ka kali hapoh ki kyndon ba thmu ban shim ia ka jingim briew. Ha ka jingtohkit, ki Pulit kila shem ba une u nongniah ka kali ula don hapdeng ka jingbuaid kyiad.