Shillong Rymphang 28: Ka Meghalaya High Court kala rejistar Suo Motu Public Interest Litigation (PIL) halor ka jingdonkam ban ithuh, ban sumar bad pynneh pynsah ia ki jaka kiba lang um ne kiba la tip kum ki Wetland, lada ki don ha ka jylla.
Kane ka long katkum ka hukum jongka Supreme Court, kaba la kyntu ia ki High Court kynthup ia ka Meghalaya “Ban shim ia katei ka Affidavit kum ka Suo Motu Public Interest Litigation ha kaba yn sa thung ia u Amicus ne u Paralok jong ka iingbishar, lada jia ba donkam khnang ba yn ioh ban iarap ia ka iingbishar ban pynthikna ba ia ka jingiatehkular Ramsar Convention kaba don hapoh u pud u sam jongki dei ban sumar bad pynneh pynsah”.
Ha kawei pat ka kyntien, ia ki jaka Wetland (jaka shong um), lada ki don hapoh ka jylla, dei ban ithuh noh ia ki, ban sumar bad ban pynneh pynsah namar ba la shim ia ki ba kidei ki jaka kiba kordor bha bad kiba kongsan bha ha ka pyrthei.
Hynrei u Member Secretary jongka Meghalaya State Wetland Authority ha ka shithi kaba ula phah ha ka 14 tarik u Rymphang, 2025 la pyntip ba kim shym la don satia kino kino ki jingpynbna ban don ia ki Ramsar Site ne Wetlands hapoh ka jylla.
Halor ka jingioh pdiang ia kane ka jingthoh na ka Registrar General, u Chief Justice ula bthah ba dei ban mudui da ka Public Interest Litigation, Suo Motu bda ka Registrar General ban pan ia ka jingpynskhem halor katei ka jingpynpaw jong ka Wetlands Authority bad ia kiwei pat ki jingbthah ban bud ryntih ia ka hukum kaba la pynmih da ka Supreme Court.
“Kumta, ai ba ia ka PIL yn rejstar katkum ka Affidavit jong ka Sorkar Pdeng ha ka Writ Petition (Civil) No.230 of 2001 – M.K. Balakrishnan & ors v. Union of India & ors,” la ong ka hukum kaba la pynmih da ka Bench kaba kynthup ia u Chief Justice IP Mukerji bad u Justice W Diengdoh ha ka sngi Palei.
“La bthah ia ka Registrar General ban phah da ka jingthoh sha ka jylla, Advocate General, Deputy Solicitor General of India, Member Secretary ka Meghalaya State Wetland Authority, Chief Conservator of Forests (Administration), ka Tnad Forests and Environment jong ka sorkar jylla hapoh ka 7 tarik u Lber 2025,” kala ong.
