Mairang, Risaw 27: Kum shibynta jong ka jingrakhe ïa ka Azadi Ka Amrit Mahotsav, ka ophis jong ka District Sports Office West Khasi Hills District, Nongstoiñ ha ryngkat ka jingïatreilang bad ka District Sports Promotion Society, West Khasi Hills District, ha ka step sngi palei ka la pynlong ïa ka jingmareh marathon kaba la tip kum ka Fit India Freedom Run 3.0 ïa kaba la sdang na ka ophis jong u Deputy Commissioner ka Eastern West Khasi Hills District, Mairang.
Ia kane ka jingmareh marathon kaba 8 Kilometer la plie da u Additional Deputy Commissioner ka Eastern West Khasi Hills Distict, Mairang, u Bah A. Nongbri bad la sakhi ïa ka jingwan ïashimbynta jong 65 ngut ki nongmareh marathon kynthei bad shynrang na ka thaiñ.
Na ka liang ki shynrang, ïa ka namjop ba nyngkong la ïoh rah da u Shainingstar Marweiñ, ïa ka namjop ba ar la ïoh rah da u Mebansaiñborlang Pathaw bad ïa ka namjop ba lai la ïoh rah da u Rahjopkordor Lyngdoh. Katba na ka liang ki kynthei, ka Balasiewdor Pathaw ka la jop ïa ka kyrdan ba nyngkong, ka Mebarisha Lyngdoh ka la jop ïa ka kyrdan ba ar bad ka Ibashongkun Kurbah ka la ïoh rah ïa ka kyrdan ba lai.
Ki nongjop ba nyngkong, ba ar bad ba lai jong kane ka jingïakob mareh marathon ki la ïoh rah ïa ka song pisa kaba san hajar, lai hajar bad ar hajar tyngka.
