Shillong, Risaw 15 : Ki kynhun ba dang shu kiew thymmai-ka Laitkor Sports Club bad Nongrim Hills Sports Club kila ioh ia ka burom ban ot ribbon ia ka lympung ialehkai OC Blue Shillong Premier League (SPL) 2024 da ka jingiakhun ba nyngkong eh jong kane ka samoi ialehkai ha ka por 11:50 mynstep ha madan SSA, First Ground, Polo.
Ka lympung OC Blue SPL bala pynlong da ka Shillong Sports Association (SSA) kan sakhi ia ka jingiakhun haduh 10 tylli ki club ha kane ka samoi ba kynthup ia ka Champion jong u snem bala lah-ka Mawlai Sports Club, ka Runners-Up Rangdajied United FC, ki kynhun ba rem ha ka semi-final-ka Shillong Lajong FC bad ka Langsning FC.
Kiwei pat ki kynthup ia ka Ryntih FC, Sawmer SC, Nongthymmai SC, Nangkiew Irat SC bad ka Laitkor bad Nongrim Hills.
Ha kane ka samoi, ka SSA kala rai ban pynlong haduh 2 tylli ki jingiakhun ha kiba bun ki sngi. Ha ka sngi sdang, nalor ka Laitkor bad Nongrim Hills, ka jingialehkai ba-ar kan long hapdeng ka Sawmer pyrshah ia ka Nangkiew Irat ha ka por 2:45 baje.
Ka Sawmer kala pyndep ha ka kyrdan kaba hynriew hapoh ka SPL 2023 katba ka Nangkiew Irat kala pyndep ha ka kyrdan ba khatduh. Hynrei, ka SSA kala rai ban pyllait ia ka Nangkiew Irat bad ka Nongthymmai kaba wan ha ka kyrdan ba 7 na ka jinghiar sha ka 1st Division.
U President ka SSA Bah Banteidor Lyngdoh ula pynbna haba jingialang artaiew mynshuwa ba ka khusnam song pisa ha kane ka samoi ialehkai kan long arshah sha ka Champion ka ban ioh T.6 lak katba ka runner-up kan ih T.3 lak.
 kan sakhi ia ka jingiakhun haduh 10 tylli ki club ha kane ka samoi ba kynthup ia ka Champion jong u snem bala lah-ka Mawlai Sports Club, ka Runners-Up Rangdajied United FC, ki kynhun ba rem ha ka semi-final-ka Shillong Lajong FC bad ka Langsning FC.){kind=link}