Shillong, Jan 30: Ka Rangdajied United FC kala pynrem da 8-0 ia ka Ryntih FC ha ka jingiakhun ha ka OC Blue Shillong Premier League 2024 kaba la long hynne ka sngi Palei ha SSA Stadium, First Ground, Polo.
U Owanijuh Pajuh ula ioh ia ka hat-trick ha ka kylla step da kaba ioh thep ia ka kol ha ka minit kaba 12, 29 bad 36.
Kiwei pat kiba la thep kol ki kynthup ia u Dibormi Kassar ha ka 30 minit, u Wansiewdor Nengnong ha ka 47 bad 54 minit, u Aenam Jyrwa ha ka 53 minit bad u Benny Khriam ha ka 70 minit.
Ka Ryntih kam shym la ioh than ia ki kabu ban thep kol, hynrei u Banteilang Lyngdoh ula shut ia ka free-kick ha ka kylla miet hynrei katei ka bol kala leit dei ia u diengkol bad mih noh shabar.
Ka Rangdajied kala bteng ban ialehkai bha ha kaba ym shim la don kano kano ka kynhun kaba la lah ban thep kol pyrshah ia ka ha kine ki 10 tylli lynter ki jingiakhun kiba la dep.
Kane ka jingjop kala pynlong ia ka RUFC ban don ha ka kyrdan ka baar da kaba ioh 26 point katba ka Shillong Lajong kala ioh 25 point hynrei ka dang don sa artylli ki jingiakhun kiba dang sah.
Ka Ryntih kala don sha trai duh da kaba ioh khur tang 3 point bad kala mad 10 sien lynter ia ka jingrem ha kane ka lympung iakob ialehkai football.
Ka jingiakhun ha ka sngi Thohdieng kan long hapdeng ka Nangkiew Irat SC pyrshah ia ka Sawmer SC ha ka por 2:30 mynsngi.
