Shillong, Rymphang 16 : Ka Nongthymmai SC kala pynrem ia ka Sawmer SC da 3-2 ha ka jingiakhun ha ka OC Blue Shillong Premier League 2024 kaba la long ha SSA Stadium, First Ground, Polo, ha ka sngi Saitjain.
Hashwa kane, ka Rangdajied United FC kala pynrem ia ka Langsning FC da 3-1.
Ka Sawmer kala ioh thep nyngkong ia ka kol ha ka minit kaba 9 lyngba u Diego Khyriem hynrei ka Nongthymmai kala iakhun tyngeh bad kala ioh ban thep ia ka kol lyngba u Rudolf Shadap ha ka minit kaba 14, hadien kane, ka Sawmer lyngab u Shanmeiaki Warlarpih ula ioh thep ia ka kol ha ka 25 minit hynrei ka Nongthymmai kala ioh biang ban pyniakhiad haka minit kaba 38 ha kaba Iohborlang Mukhim ula ioh thep ia ka kol.
Ka jingiakhun kala kut noh ha ka jingiakhiad ha ka kylla step, hynrei ha ka kylla miet u Donboklang Majaw ula thep ia ka kol ha ka 65 minit lyngba ka Penalaty kaba la pynlong syndon ia ka Nongthymmai ban khur ia ka jingjop.
Ha kawei pat ka jingiakhun, hapdeng ka Rangdajied pyrshah ia ka Langsning FC watla ki rangialehkai kila ioh ia ki kabu hynrei kim shym la lah ban thep kol bad ka jingiakhun ha ka kylla step kala kut noh ha ka jingiakhaid khelm ka jingioh thep kol.
Ha ka kylla miet ka Rangdajied kala sdang ban ialehkai bha ha kaba u Arlangky Nongsiej ula thep ia ka kol ha ka 54 minit bad ha ka minit kaba 87 lyngba ka Penalty bad u Benny Khriam ula thep ia ka kol ha ka 59 minit, katba u Roikhihbha Nongtdu ula thep ia ka kol ha ka minit kaba 61 na ka bynta ka Langsning.
Ka RUFC kala jop 10 sien bad mynta kala don ha ka kyrdan ka baar da kaba ioh khur 32 point, katba ki 3 tylli ki kynhun kiba don ha ki kyrdan Top 3 ki kynthup ia ka Mawlai SC kaba la kamai 32 point kaba bat ia ka kyrdan kaba nyngkong bad ka Shillong Lajong kala bat ia ka kyrdan kaba lai.
Ka Sawmer kala neh hi ha ka kyrdan kaba 7 hynrei lada dei ba ka khur ia ka jingjop kala dei ban don ha ka kyrdan kaba 4. Ka Nongthymmai ka dang don hi ha ka kyrdan ba ka lah ban shah pynhiar kyrdan noh kaba la kamai tang 11 point bad kan hap ban iakhun tyngeh ia ki jingiakhun kiba dang sah bad kadei ban khur ia ka jingjop ban lait na katei ka jingma.
Ha ka sngi Nyngkong ka jingiakhun kan long hapdeng ka Ryntih FC pyrshah ia ka Shillong Lajong ha ka por 11baje mynstep bad ha ka por 2:30 mynsngi ka jingiakhun kan long hapdeng ka Nongrim Hills SC pyrshah ia ka Mawlai.
