Shillong, Nohprah 09: Ka Nongrim Hills SC kala pynliem ia ka Nangkiew Irat da 5-2 ha ka jingialehkai Football jongka OC Blue Shillong Premier League 2024 kaba la long hynne ka sngi Nyngkong ha SSA Stadium, First Ground, Polo.
Hashwa kane, ka Laitkor SC pynrem da 2-0 ia ka Ryntih FC kaba don ha kak yrdan kaba ha trai duh.
Ka Nangkiew Irat lada dei ba kala lah ban ialehkai bha bad ban khur ia ka jingjop kala dei ban kylla long kum ka kynhun kaba bat ia ka kyrdan kaba nyngkong eh ha kane ka lympung iakob hynrei na ka jingbym lah ban ialehkai bha, kala pynlong ia ka Nongrim Hills ban jop da kaba suk.
U Alem Khongwir ula thep ia ka kol ha ka minit kaba 15 bad lyngba ka Penalty kaba ula leit shut haka minit kaba 52, u Mebanshan Suting ula thep ha ka 22 minit, u Bankit Nongrum ula thep ha ka minit kaba 24 bad u Banshemphang Kurbah ula thep ia ka kol ha ka 62 minit na ka bynta ka Nongrim Hills.
Katba u Ronaldkydon L Nonglait ula the par kol ia ka Nangkiew Irat ha ka minit kaba 33 bad 90’+2.
Ka jingioh lad ka Nongrim Hills ban ioh thep kol kadei namar ka jingbym lah ban ialehaki bha ki rangialehkai kiba shadien jong ka Nangkiew Irat ha kaba u nongap kol u Surjay Kumar Pariyar ym shim la lah ban pynsangeh ia ki nongialehkai ka Nongrim Hills ban thep kol.
Ha ka jingiakhun hapdeng ka Laitkor SC pyrshah ia ka Ryntih FC ka kylla step kala kut ha ka jingiakhaid ha kaba kim shym la lah ban thep kol watla kila ioh ia ki katto katne ki kabu ruh.
Ha ka kylla miet ka Laitkor SC kala ioh thep 2 kol ban khur ia ka jingjop lyngba u Moonstar Nongsiej ha ka 66 minit bad u Samborwell Mynsong ha ka 78 minit.
Ia kane ka lympung ialehkai jongka OC Blue SPL 2024 yn pynsangeh shwa shipor kum shi bynta ban kyrshan ia ka kynhun ialehaki ka Meghalaya kaba leit ban iashimbynta ha ka Senior Men’s National Football Championship jongka Santosh Trophy 2024-25 khamtam haba ki nongialehkai kiba mihkhmat ia ka jylla kiba bun hi kidei kiba mihkhmat ia ki kynhun ialehkai ka jylla ha ka SPL.
