Shillong, Nailar 28: Ka Nangkiew Irat kala pynrem ia ka Sawmer da 5-1 ha ka jingiakhun ha ka Shillong Premier League 2025 kaba la long ha SSA Stadium, First Ground, Polo, hynne ka sngi Palei.
U Himanshu Patil ula thep ia ka kol ha ka 15 bad 42 minit, katba u Ronaldkydon L Nonglait ula thep ia ka kol ha ka 46 bad 50 minit bad u Banshanlang Nongdhar ula thep ia ka kol ha ka 48 minit na ka bynta ka Nangkiew Irat, katba u Bisharlang Mawthoh ula thep ia ka shi kol ia ka Sawmer ha ka minit kaba 18.
Kane ka jingjop kaba laisien lynter kala pynlong ia ka Nangkiew Irat ban neh ha ka kyrdan kaba nyngkong ha ka SPL 2025 bad mynta kala kamai 9 point. Katba ka Sawmer kala ioh 3 point kala don ha ka kyrdan kaba hynniew bad kala kham ialehkai sniew ban ia ka Malki.
Mar ia sdang ka jingiakhun ka Nangkiew Irat kala ioh thep ia ka kol ha ka 15 minit lyngba u Himanshu hynrei tang hadien 3 minit u Bisharlang ula ioh ban thep ia ka kol ban pyniakhiad ia kane ka jingiakhun.
Ka Sawmer kala pyrshang ban ialehkai bha hynrei u nongialehkai ka Nangkiew Irat u Himanshu ula ioh thep kol ia ka kol ka baar ha ka minit kaba 42 bad ka Nangkiew Irat kala tam da shi kol ha ka kylla step.
Ha ka kylla miet, ka Nangkiew Irat kala ioh thep sa 3 kol ha kaba u Ronaldkydon ula ioh thep 2 kol bad u Banshanlang ula thep shi kol bad kane kala pynjem khnap syndon ia ki nongialehkai ka Sawmer.
Lashai ka sngi Thohdieng ka jingiakhun kan long ha ka por 4:30 janmiet hapdeng ka Langsning pyrshah ia ka Mawlai.
