Shillong, Iaiong 12: Ka Mawlai SC kala pynrem ia ka Nongthymmai SC da 2-1 ha ka jingiakhun ha ka Shillong Premier League 2023 kaba la long hynne ka sngi Thohdieng ha SSA Stadium, First Ground, Polo. Katei ka jingjop kala pynlong ia ka Mawlai SC ban bat iaka kyrdan kaba nyngkong ha ka SPL.
Kane ka jingkhun kala long kaba itynnad ha kaba ki rang ialehkai jong kitei ki ar tylli ki kynhun kila ialehkai bha naduh ba sdang haduh ban da kut ka jingialehkai ha ka kylla step ha kaba ym shim la don kiba la lah ban thep kol watla kila ioh ia ki katto katne tylli ki kabu ksiar.
Ynda la sdang ka kylla miet ba kine ki rangialehkai kila bteng biang ban ialehkai bha ha kaba u Dajiedlang Wanshnong ula ioh thep ia ka kol na ka bynta ka Mawlai ha ka minit kaba 58.
Kane kam shym la pynduh mynsiem ia ka Nongthymmai hynrei ha ka minit kaba 80 u Rabi Hansda ula thep ia ka kol ban pyniakhaid bad ka Mawlai hynrei tang hadien 6 minit ka Mawlai kala ioh thep ia ka kol ka baar lyngba u Pynbha Suting bad kane ka kol kala pynlong ia ka Mawlai ban ioh khur ia ka jingjop bad ban ioh bat ia ka kyrdan kaba nyngkong ha ka SPL.
Ka Mawlai kadei ka kynhun kaba nyngkong eh ban kamai 10 point bad kam shym la mad ia kano kano ka jingrem ha kane ka jingiakhun, katba ka Nongthymmai kala don ha ka kyrdan kaba 6 da kaba kamai 3 point.
Ka jingiakhun ha ka sngi saitjaiñ kan long hapdeng ka Rangdajied United FC pyrshah ia ka Shillong Lajong FC bad kine ki kynhun baroh ar tylli ki ia ryngkat mar 9 point da kaba jop mar 3 sien.
