Shillong, Nailar 07: Ka Langsning Football Club kala sdang beh mynta ia ka jing kamai point sha ka kyrdan ba nyngkong ha ka OC Blue Shillong Premier Leaque 2021-2022 da ka jingjop ia ka Malki Sports Club haduh 5-0 kol ha ka jingiakhun ba long hynnin ka sngi saitjain.
Ka Langsning FC ka don mynta ha ka kyrdan hadien jong ka Mawlai Sports Club kaba dang tam 2 point bad ialehkai duna kawei ka jingialehkai.
Kane ka kynhun Ialehkai ba pawnam ka Jylla kala ioh kamai mynta haduh 17 point bad tam haduh 5 point ia ka Rangdajied United kaba la ialehkai mar katjuh sien ki jingialehkai.
Ha ka jingialehkai hynne ka sngi, ka Langsning naduh kaba sdang kala ialehkai bha bad ha ka kylla step kala ioh ban thep haduh 2 kol kiba la wan lyngba ki kol jong u samla Shano Tariang uba la ioh ban thep ia ka kol ba nyngkong ha ka minit ba 22 bad kaba ar ha ka minit ba 34.
Ha ka kylla miet, ka Langsning kala ioh ban thep biang sa lai kol bad ar tylli ki dei kiba la thep da u samla Dibinrou Nongspung ha ka minit ba 58 bad 59.
Ka kol kaba khatduh kala wan ha ka minit ba 74 bala thep da u samla Roikhihbha Nongtdu.
Ha ka 9 tarik Nailar, ka jingiakhun kan long hapdeng ka Rangdajied United pyrshah ia ka Nangkiew Irat Sports Club.
