Shillong, Nailar 06: Ki Pulit ka West Jaintia Hills hynnin ka miet, kila ioh ban pyllait im ia 7 tylli ki mrad khlaw ba don jingma ban duh jait noh (endangered) bad ioh kem ia arngut ki briew kiba dei ki nongkhaii ia ki mrad khlaw.
Kine ki mrad khlaw ki kynthup ia 2 tylli ki shrieh huleng (hillock gibbons), uwei u Kohkarang India (Indian Hornbill), 2 tylli ki shrieh lungur, uwei u shrieh leaf monket bad uwei u kynja ksih (otter).
U Superintendent of Police ka West Jaintia Hills u Bikram D Marak u pyntip ba ia kine ki mrad khlaw la ioh ban pyllait im na kawei ka kali Tata Sumo ML-11-0661 ba la ioh ban bat da ki Pulit ka Phramer Traffic Cell halor ka jingioh khubor ba thikna ia ka jingwan kane ka kali ba kit ia kine ki mrad khlaw.
Kane ka kali ka dei kaba la niah da uwei u briew uba kyrteng u Kormola Bru ba 24 snem ka rta na Mizoram bad ka dei ruh kaba wan ma Mizoram ban leit sha Guwahati.
Une u Heh Pulit u iathuh ba hadien ka jingiohbat ia kane ka kali, ki Pulit kila pynlong ia ka jingtalasi bad kila shem ia 6 tylli ki synduk ba thep ia kine ki 7 tylli ki mrad khlaw ba jan duhjait, kiba hap hapoh ka Schedule-I &II jong ka Wild Life Protection Act, 1972.
Ia u Nongniah bad uwei pat uba iadonlang ha ka kali bala kem da ki Pulit, la aiti noh ha ryngkat kine ki mrad khlaw sha u Range Forest Officer, Jowai Division ba un leh ia kaba donkam.
Une u Heh Pulit u pyntip ba ki Pulit kila register case ia kane ka kam hapoh ka Schedule- I &II jong ka Wild Life Protection Act bad ka International Union for Conserbation of Nature (UCN) Red List.
Ka jingtohkit ia kine ki briew kala iaid shakhmat khamtam eh ban lap ba kumno kila iohkem ia kine ki mrad bad wanram sha ka Jylla.
