Shillong, Nohprah 06: Ka Nongrim Hills SC bad ka Nangkiew Irat SC kila pyni ia ka jingtbit ka jongki ha kaba na ka jingshah thep kol kila lah ban pynphai kylla ban khur ia ka jingjop ha ka OC Blue Shillong Premier League 2024 kaba la long hynne ka sngi Thohdieng ha SSA Stadium, First Ground, Polo.
Ka Nongrim Hills kala pynrem ia ka Langsning FC da 4-3 katba ka Nangkiew Irat kaba ialehkai tang 10 ngut ki nongialehkai kala pynrem ia ka Nongthymmai SC 4-2.
U Alem Khongwir ula thep ia ka kol ha ka minit kaba 3′, u Mebanshan Suting ha ka 65 minit bad u Glennys Lynrah ula thep ia ka kol ha ka 87 bad 89 minit na ka bynta ka Nongrim Hills, katba u Lamgougin Khongsai ula thep ia ka kol ha ka 13 minit, u Daohipaia Rymbai ha ka 46 minit bad u Enestar Malngiang ha ka 83 minit na ka bynta ka Langsning.
Ka jingiakhun kala long kaba itynnad ha kaba baroh artylli ki kynhun kila ialehkai bha, ha kaba man ba thep kol ka Langsning, ka Nongrim kala ioh ban pyniakhaid hynrei shwa ban kut artad ka jingiakhun ka Nongrim Hills kala ioh thep ia ka kol ban khur syndon ia ka 3 point.
Ha ka jingiakhun hapdeng ka Nangkiew Irat pyrshah ia ka Nongthymmai SC kala long kaba itynnad ha kaba ka jingiakhun kala kut da ka jingioh thep shi kol ka Nongthymmai lyngba u Ronald Singh Shaikom ha ka 44 minit.
Hynrei ynda la iaid ka kylla miet ka Nangkiew Irat kla ioh thep 4 kol hynrei ka Nongthymmai kala ioh ban thep biang sa tang shi kol.
U Wallamsuk Nongkhlaw ula thep ia ka kol ha ka 54 bad 80 minit bad u Ronaldkydon L Nonglait ula thep kol ha ka 70 bad 90 minit naka bynta ka Nangkiew Irat, katba u Sorokhaibam Meitei ula thep ia ka kol ha ka 61 minit na ka bynta ka Nongthymmai.
Kane ka jingjop kala pynlong ia ka Nangkiew Irat ban don ha ka kyrdan kaba 3 da kaba ioh 12 point, katba ka Nongthymmai kala ioh 7 Point bad ka iakhaid bad ki 3 tylli ki kynhun kiba ioh lang mar katjuh ia ka point hynrei ka Nongthymmai kala wan kham shakhmat ha kakyrdan kaba 6 bad kiba bud nadien ki jongka ki kynthup ia ka by Nongrim Hills, Langsning bad Laitkor SC.
Ha ka lah sngi u Blei ka jingiakhun ha ka OC Blue SPL 2024 kan long hapdeng ka Laitkor pyrshah ia ka Ryntih FC ha ka por 11:30 mynstep bad hadien kane ha ka por 2:30 mynsngi ka Nangkiew Irat kan iakhun pyrshah ia ka Nongrim Hills.
