Shillong, Jan 20: Kala long ka sngi kaban sah jingkynmaw ia u Babysunday Marngar uba la ioh thep ia ka hat-trick na ka bynta ka Shillong Lajong FC kaba la pynrem syndon da 6-1 ia ka Nongthymmai SC ha ka jingiakhun ha ka OC Blue Shillong Premier League 2024 kaba la long ha SSA Stadium, First Ground, Polo, hynne ka sngi nyngkong.
U Babysunday ula thep 3 kol ha ka minit kaba 20, 40 bad 60 na ka bynta ka Lajong, katba u Firstborn Roy Khongsti ula thep kol ha ka 22 minit, u Yohaan Benjamin ha ka 32 minit bad u Emanbha Marbaniang ula thep kol ha ka 63 minit.
Ka Nongthymmai kala ioh thep tang shi kol lyngba u Donald Tariang ha ka 52 minit.
Kane kadei ka jingiakhun kaba khatduh ha ka wat kaba nyngkong ia kine ki artylli ki kynhun, ka Lajong kala ioh khur 22 point da kaba jop 7 sien, iakhaid shisien bad mad shisien ia ka jingrem.
Ka Nongthymmai kala kamai 7 point da kaba jop arsien, iakhaid shisien bad rem haduh hynriew sien.
Mar ia sdang ka kylla step, ki nongialehkai ka Lajong kila ialehkai bha bad kila ioh thep 4 kol hynrei ka Nongthymmai kam shym la ioh thep kol eiei ruh em watla kala ioh ia katto katne tylli ki kabu.
Ha ka kylla miet, ka Nongthymmai kala sdang ban ialehkai bha bad kala thaw ia ki lad ki lynti ban ioh thep kol hynrei kam shym la lah namar ka jingtbit jong u nongapkol ka Lajong u Siwel Rymbai uba la iada ia ka bol ban rung shapoh kol.
Ka Lajong kala bteng biang ban thep sa 2 kol ha ka kylla miet hynrei ka Nongthymmai kala ioh ban thep tang shi kol ha kane ka jingiakhun.
Ka jingiakhun ha ka sngi Baar kaban dei syndon ka jingialehkai kaba khatduh jong ka wat kaba nyngkong, kan long hapdeng ka Mawlai SC pyrshah ia ka Sawmer SC ha ka por 2:30 mynsngi.
