Shillong, Naitung 27: Ka Nongkseh ka la ioh iaka jingjop ha ka jingialehkai ba nyngkong jong ka Shillong Premier League daka ba pynliem ia ka Mylliem, ka thain kaba don marjan.
Ka Nongkseh ka la jop da 1-0 kol lyngba ka kol bala thep da u Aibiangmame Nongneng (45’+5) haka jingïalehkai kaba itynnad bha hapdeng ki kynhun jong ka thain Upper Shillong.
U referee G Marwein u la hap ban sei bun sien ki card ha kaba katto katne ngut ki nongialehkai ki la shah ai yellow card bad shwa ban kut ka jingialehkai, mar uwei u rang ialehkai na baroh arliang kila ioh red card.
Ka Mylliem ka la ialehkai bha haka kylla step bad kala ioh ka lad ban lah pynkhih jar lyngba u Remark Kharmalki bad u Kevizakie Ciesotsu hynrei kim shym la lah satia ban pynkylla sha ka kol.
Ka Mylliem ka la hap ban pyni iaka jingialehkai kaba kham itynnad haka kylla miet daka ba pyrshang ban thep goal hynrei ka la shah khanglad haba u Shaibor Nongrum u la shah beh noh na madan hadien ba ioh biang ka yellow card.
Ha kawei pat ka liang u Arlangky Nongsiej na Nongkseh u la ioh red card da ka jingioh artylli ki yellow card.
U Istarbor Marngar ka la ïoh ïa ka kabu kaba bha tam naka bynta ka Mylliem hynrei u nongapkol ka Nongkseh u Guidle Syiemlieh u la lah iada ban shah thep goal.
Ka jingialehkai lashai ka sngi kan long hapdeng ka Rangdajied United pyrshah ia ka Meghalaya Police ha ka por 6:30 janmiet.
Mynshem snem ka Rangdajied ka wan ba san haka SPL, katba ka MLP ka la shah kyntiew kyrdan na ka First Division hadien ba ka la wan ba ar.
Kane kan dei ka jingïalehkai ba nyngkong jong ka kynhun ki pulit ha ka SPL naduh u snem 2018 hadien ba kala shah pynhiar kyrdan noh.
