Shillong, Rymphang 10: Ka Ryntih FC kala pynrem ia ka Nongthymmai SC da 4-1 ha ka OC Blue Shillong Premier League 2024 kaba la long hynne ka sngi Nyngkong ha SSA Stadium, First Ground, Polo bad kane ka jingjop kala pynkut shi syndon ia ka jingrem kaba 11 sien lynter jong ka Ryntih FC.
Katba ha kawei pat ka jingiakhun, ka Shillong Lajong FC kala pynrem ia ka Laitkor SC da 6-0.
Ka Ryntih kala dep ban pynrem ia ka Nongthymmai da 3-0 ha ka jingiakhun ha ka wat kaba nyngkong kaba la long ha ka 17 tarik u Risaw bad hadien kane kala bteng ban mad ia ka jingrem 11 sien lynter.
Hynne ka sngi, u Wanshanlang Dkhar ula thep ia ka kol lyngba ka penalty ha ka 53 minit bad ula ioh thep biang ia ka kol ha ka 82 minit, u Andy Mawthoh ula thep ia ka kol ha ka 57 bad 68 minit na ka bynta ka Ryntih, katba u Mowell Chyne ula thep ia ka kol ha ka 79 minit na ka bynta ka Nongthymmai.
Ha ka por mynstep, ka Lajong kala bteng ban ialehkai bha bad kala pynrem da 6-0 ia ka Laitkor.
Mar ia sdang hi ka jingiakhun, u Yohaan Benjamin ula thep ia ka kol ha ka minit kaba 8 bad ha ka kylla miet ka Lajong kala bteng ban thep sa 5 kol bad ia kitei ki kol la thep da u Deibormame Tongper ha ka 64 minit, u Iohborlang L Lyngkhoi ula thep lyngba ka penalty ha ka 83 minit, u Emanbha Marbaniang ula thep ha ka 86 minit bad u Babysunday Marngar ula thep ia ka penalty ha ka 90’+4 bad ha ka 59 minit kala don ka jingbakla kaba ka Laitkor kala kum thep hi ia ka bol sha la kol lajong.
Ka Lajong mynta kala bat ia ka kyrdan kaba nyngkong, katba ka Mawlai SC bad ka Rangdajied United FC kila ioh mar 29 point hynrei ka Rangdajied kala wan noh ha ka kyrdan ka balai.
Ka jingjop ka Ryntih kam shym la wanrah ia kano kano ka jingkylla namar kala neh hi ha kajuh ka kyrdan kaba a don baroh shi katta bad kala ioh mynta 6 point bad ka bud nadien jong ka Nongthymmai. Nalor kane ka Nongthymmai kala mad ia ka jingeh ba ka don ha ka bynta ban shah pynhiar kyrdan noh.
Lashai ka sngi Baar kin don artylli ki jingiakhun kata ha ka por 11 baje mynstep ka Sawmer SC kan iakhun pyrshah ia ka Nongrim Hills bad ha ka por 2:30 mynsngi ka Mawlai kan iakhun pyrshah ia ka Nangkiew Irat.
