Shillong, Jymmang 12 : Ka Mawlai Sport Club kala ioh rah biang ia ka nam Champion kaba long ar samoi kynthih, da ka jinglah ban pynliem ia ka Rangdajied United da 1-0 kol ha ka phainal hynnin ka sngi Saitjain.
U rang ialehkai Donlad Diengdoh ula ioh thep ia kane ka shi kol jong ka jingiakhun kaba la wan lyngba ka heading ban pynthikna ia ka result jong ka jingiakhun. Ka Rangdajied kala iakhun tyngeh ban pynphai hynrei kam shym la seisoh satia.
Ka Rangdajied sa shisien kala iai long ka Runners-Up ha kine ki ar samoi jong ka jingiakhun da ka jinglieh ha ka Mawlai SC ha ka samoi 2022 bad mynta u 2023.
Ka Mawlai SC kala ioh rah ia ka Champion’s Trophy bad ka cheque ba T. 3 lak na u Kongsan Bah D.P Wahlang. Ka Rangdajied kala ioh rah ia ka song pisa ba T. 1.5 lak.
Kane ka jingiakhun kala sakhi ia ka jingdap smam jong ka SSA Stadium da ki nongkyrshan jong baroh ar kynhun khamtam ki nongkyrshan ka Mawlai kiba la wan ha ryngkat ki lama stem.
