Shillong, Nailar 23 : Ka Sorkar Jylla kala iapynbeit bad ka Durand Cup Organising Committee (DCOC) ban buh iaki Fan Park (jaka peit phutbol ki nongkyrshan) ha man ki jaka jong ka Nongbah Shillong, na ka bynta ka jingiakhun North East Derby hapdeng ka Shillong Lajong FC pyrshah ia ka North East United Football Club (NEUFC)-ki ban iaknieh rung sha ka phainal ka 133rd Durand Cup.
La pynbeit ruh ban pynsuk ia ki riewieid phutbol ha ka jingthied ticket da kaba rai ban buh ia ki jaka die ticket ha man ki jaka sor jong ki District ka Ri-lum Khasi bad Jaintia.
Ka jingiakhun semi phainal hapdeng ki kynhun ialehkai na ka thain Shatei Lam Mihngi (North East Derby)-ka Shillong Lajong FC bad ka NEUFC kan long ha madan JN Stadium, Polo, Shillong ha ka 26 tarik Nailar, ha ka por 5 baje janmiet.
Namar ka jingiohi ia ka jingiamih ki riewieid phutbol bad ka jingbym lah pyndap ticket, ka Sorkar Jylla bad ka Organising Committee kila pynbeit ban buh noh ia ki Fan park ha kylleng ki jaka jong ka Nongbah Shillong, ki ban pyndait ia ki Screen ban pyni live ia ki jingiakhun jong ka semi-final ka North East Derby.
Haba pyntip ia kane, u Myntri ka Tnad Ialehkai ula ong “Ngi la pynbeit ban buh ia ki Fan Park ha kylleng ki jaka na ka bynta ki riew ieid phutbol ki bym lah ban ioh ticket bad ki bym lah ban leit rung sha madan, ba kin ioh peitkai ia ka jingiakhun bad ban kyrshan ia la ka jong ka kynhun ialehkai”.
U Myntri ula ong ruh “Khnang ban pynsuk ia ki paidbah ba kin lait na ki jingwan ieng lain ban iathied ticket da ki kynta kynta, la pynbeit mynta ba ia ki ticket yn sa die paidbah ha ki jaka sor ka Jylla ba kynthup ha sor Jowai, Ri-Bhoi bad Nongstoin”.
U pyntip ba ka jingdie ia ka ticket kan long naduh ka sngi saitjain ka 24 tarik Nailar.
Ka Durand Cup kaba dang shu wan nyngkong eh ha Shillong, kala sakhi ia ka jingwan peitkai ki riewieid phutbol ka bym pat ju iohi koit ha ka jingiakhun Quarter Final hapdeng ka Shillong Lajong FC pyrshah ia ka East Bengal FC, haduh ba kam lah shuh ban pynbiang ia ki ticket.
Namar kane, ka Sorkar Jylla kala shimkhia ban iakren bad ka Organising Committee ba kan pynkynriah ia ka jingiakhun jong ka semi-final hapdeng ka Shillong Lajong FC bad ka NEUFC na Kolkata sha Shillong.
“Mar syn kut ka jingiakhun Quarter-Final, ma nga bad u CM ngi la iakren bad ki Organising Committee ban wanrah ia ka semi-final sha Shillong” ong u Myntri uba la kyntu ia ki riewieid phutbol ba kin iamih ryntih ban leit kyrshan iala ki jong ki kynhun ialehkai ha ka 26 tarik Nailar.
