Shillong, K’lyngkot 08 : U Symbud Myntri Rangbah ka Tnad Transport Bah Sniawbhalang Dhar ha ka sngi Balang, ula pynpaw ba ka project ban pynheh ia ka kadliengsuin Shillong Airport, ka lah ban shimpor haduh lai snem ban pyndep.
Haba iakren bad ki nongthoh khubor ula pyntip ba ki Deputy Commissioner kila nang iaid shaid shaid ban ithuh ia ki jaka kiba donkam ban shim ha kaban pyntreikam ia kane ka project.
“Ngi donkam kumba 22-23 acre ka jaka ban pynheh ia kane ka kad bad ngi la pyrshang ban pyndep ia ka jingpyntrei ia ka project hapoh ka laisnem. To ngin sa iapeit, to ngin kyrmen ia kaba bha tam” ong u bah Sniawbha.
Ha ki sdang bnai jong u snem bala lah, ka Iingkashari Meghalaya High Court kala pynmih ia ka hukum ba bthah ia ka Sorkar Jylla ban pyndep ia ka jingaiti noh ia ki jaka sha ka Airport Authority of India (AAI) ba kan pynheh ia ka Shillong Airport hapoh ka laibnai.
Haba kylli, u Bah Sniawbha ula pyntip ba “U Myntri ka Tnad Civil Aviation ula ai ka jingmynur da ka ktien ha ka por ba u wan sha Jylla, kumta hadien ba ngi la dep thied ia ki jaka ngin sa pyniaid ia ki kam ki jam kiba donkam baroh”.
“Ha nga hi, nga kwah lashai lashai hi hynrei haba kren hok, ka rukom treikam ka dei kaba shimpor. Ka jingthied jaka, ka jingpynkhreh ia ka DPR, ka mang tyngka, ka jingaiti ia ka kam bad kiei kiei baroh- kumta hapoh lai snem kala dei ban dep hynrei ngin pyrshang hi ban pyndep kham kloi kat kaba lah naba kan ai jingmyntoi ia ki briew jong ngi hi” ula ong.
Dang shen, u Bah Sniawbha ula pyntip ba ia ka kam thied jaka yn sa pyndep noh hapoh u bnai Lber mynta u snem.
Ula pyntip ba ka Sorkar kala dep ban leh ia ka sorjamin bad mynta kala dep ruh ban ithuh ia ki trai jaka.
