Shillong, K’lyngkot 08 : U National General Secretary ka National People’s Party (NPP) bad Symbud Myntri Rangbah ka Jylla Bah Sniawbhalang Dhar ha ka sngi Balang ula ong ba ka jingisih Sorkar kan nym ktah satia ia ka NPP ha ka elekshon ban wan sha ka Iingdorbar KHADC bad JHADC, ka ban long ha ka 21 tarik u Rymphang.
Kane ka jingkynthoh kala mih kum ka jingkynthoh ia ka rai ba dang shen jong u MDC ka Mawlai Bah Teiborlang Pathaw ban mih noh na ka party hatmier jong ka elekshon.
Haba kylli, u Bah Sniawbha ula ong “Em wat kylla ia nga, ka shong ha ki (MDC). Ngin ai ka jingiakhun kaba itynnad ha kane ka elekshon. Kum ka party, ngi la pynkhreh ban leit sha ka elekshon bad ngi kyrmen ba ngin ioh ia ka jingjop kaba bun eh”.
Ula ong ruh ba kam don satia ka jingisih Sorkar ka ban treikam pyrshah ia ka NPP. “Wat lada ka don makna, ngi hap ban trei shitom” ula bynrap.
U Symbud Myntri Rangbah ula kam ba ki don bun bah ki briew kiba kwah ban iakhun na ka NPP ha kane ka elekshon bad ong “KI don ki briew kiba kwah wan bad don ruh kiba kwah mih, kane ka dei kaba ju jia beit ha ka por elekshon”.
Haba pynpaw ba ka VPP kam dei satia ka jingma ia ka NPP, u Bah Sniawbha ula ong “Em, ki (VPP) kim dei ki jingma ia ka NPP namar ka don ka jingiapher na kawei ka constituency sha kawei pat. Kam dei kajuh ka rukom long”.
“Ka jingkhmih lynti jong ngi ka long ba ngin thaw hi ia ki Executive Committee ha baroh artylli ki ADC ka Ri-lum Khasi bad Jaintia” ula bynrap.
