Jorhat, Lber 07 : Ka iing bishar hapoh Jorhat district ka Assam hynnin ka sngi Nyngkong ka la rai pynrem ia ki 11 ngut ki briew da kaba set phatok shijunom namar ka jingdonkti ha kaba bom iap ia uwei u samla 23 snem rta ha u bnai Jymmang 2020, kata ha ka por ba la pynjari ia ka jingkhangdam hapoh ka ri namar ka jingpang Covid-19.
Ka iingbishar ka la pyllait noh ia hynniew ngut kiwei pat halor kane ka jingjia namar ka jingbym don ia ki sakhi satar kiba biang ban pynshisha.
Utei u lanot ia u ba la tip kyrteng kum u Debasish Gogoi u la ngat ha ka jingshah thombor hadien ba u la wanphai sha la iing na ka jingleit shangkai sha kawei ka jaka jngohkai ha Gabhoru Parbat ha ryngkat u paralok jong u.
Hadien katei ka jingshah thombor la pynkit noh mar mar ia kitei ki arngut shapoh Jorhat Medical College and Hospital, ha kaba u Gogoi u la khlad noh namar ka jingmynsaw kaba jur, katba u paralok jong u, u Aditya Das u la lait im.
Halor kane ka jingjia na ka liang ki pulit ki la kem noh ia 18 ngut ki briew halor ka jingshah kynnoh donkti ha kaba la pynngat ruh ia ki halor kane ka jingjia.
“Hadien palat ar snem shiteng, ngi la iakhun ia kane ka case hapoh ka iingbishar. Kito kiba la shah rai pynrem ki la iam hadien ba ka iingbishar ka la rai pynrem ia ki da kaba set phatok shi junom,” ong ki lad pathai khubor kiba la shim ia ka jingkren jong u kpa jong utei u lanot.
