Shillong, Naitung 12: U President ka Ri-Bhoi Youth Federation (RBYF) Bah Bipul Thangkhiew hynne ka sngi ba-ar, ula phla paidbah ba ki Sengbhalang kila shah shet kylla ha ka Sorkar Meghalaya United Alliance (MUA) ba ialam da u Dr Mukul Sangma, ha ka jingiakhih dawa Inner Line Permit (ILP) jong u snem 2012-2013.
Une u Nongialam Sengbhalang na Ri-Bhoi ula phla ia kane ha ka jingialang pynkup burom khatduh ka FKJGP ia u President bala shongthait noh Bah Wellbirth Rani bad ka jingpynbam smai ia ki Nongialam ba thymmai ka Central Executive Committee (CEC) ba long hynne ka sngi ha Soso Tham Auditorium.
“Ka jingiakhih dawa Inner Line Permit (ILP) ka dei kaba jur eh ha u snem 2012 ha ka por ba synshar ka Sorkar MUA ba ialam da u Dr Mukul Sangma bad kane ka jingiakhih kala neh haduh 6 bnai eiei. Ha kane ka por haduh 13 tylli ki Sengbhalang kila iatreilang ban pynbor ia ka Sorkar ba kan pyntreikam ia kane ka ain ba pyrrkhing ia ka jingrung kyrthep ki bar jylla sha Jylla” ula ong.
“Hynrei u Dr Mukul Sangma ula khot iakren ia ki Sengbhalang bad kyrpad ban pynjai jai noh ia ki jing iakhih ban ailad ia ka elekshon jied Nongmihkhmat (Election MLA-2013) ba kan iaid beit iaid ryntih haba kular ruh ban sa shimkhia ia kane ka kam hadien bala thaw Sorkar thymmai” ula bynrap.
U Bah Bipul u iathuh ba tang hadien 5 bnai ba thaw sorkar biang ka kynhun synsop Meghalaya United Alliance-II (MUA-II), u Dr Mukul ula khot iakren biang ia ki Sengbhalang ban iatai sani halor ka jingdawa ILP.
“Kumba iuh tdong….ngam ong shuh bsein hynrei tdong Anaconda, u Dr Mukul ula sei pynban ia ka manifesto elekshon jong ka Party bad ong ba ka mat jingdawa ILP kam don satia ha ka mat treikam bad kane kala pynbitar lep ia baroh ki Sengbhalang” ula iathuh.
U Bah Bipul u ong ba kane ka jingleh u Dr Mukul ka dei ka jingthok bad jingshet kylla pyllein pyllein ia ki Sengbhalang kiba la shim ia ka rai ban nym ailad shuh ia ka Congress ha ka elekshon jong u snem ba bud (MDC).
U Bah Bipul u iathuh ba dei ruh kane ka daw ba ka jingiakren kala mih halor kiwei pat ki ain bad kaba pynkha ia ka Meghalaya Residents Safety and Security Act, 2016.
Lah ban kdew hangne ba u Dr Mukul Sangma bad 11 ngut ki MLA ka Congress, kila leit pyniasoh mynta sha ka All India Trinamool Congress (AITC) ban iakhun ia ka elekshon MLA 2023 ha Jylla.
