Shillong, Iaiong 14: U Symbud Myntri Rangbah ka Jylla uba khmih iaka tnat Transport Bah Sniawbhalang Dhar u la pyntip ba ka jingpynheh ia ka kad liengsuin jong ka Shillong kan sa sdang noh shen ban pynthikna ba ki liengsuin kiba kham heh kin lah ban hiar ha u snem ban wan ha kane ka kad.
Haba kren sha ki lad pathai khubor, u Bah Sniawbhalang u la ong “Ngi la ioh ka khubor kaba bha. Ka Airport Authority of India (AAI) ka la khot Tender ban pynheh ia ka kad liengsuin jong ka Shillong bad nga kyrmen ba hapoh u snem 2026, ngin sa lah ban ioh ia ki liengsuin kiba heh ban hiar ha kane ka kad liengsuin”.
“Ka jingshim jaka ka la jan dep bad shen ngin sa siew ia ka bai lutksan jaka. Baroh ki kam ki long kiba iaid beit namar kata ka daw ba ka AAI ka la lah ban khot tender kham kloi” u la ong.
Ka AAI ka la pynmih ia ka jingpynbna tender ha ka 5 tarik Iaiong 2025 na ka bynta ban pynheh ia ka kad liengsuin jong ka Shillong bad kane ka sienjam ka wan haka jingïalam da u Myntri Rangbah ka Jylla u Conrad K Sangma, uba la kular ban shim ki sienjam ban pynheh iaka kad liengsuiñ.
Ka jingpynheh iaka kad liengsuin ka kynthup ia ka jingpynheh ia ka lynti iaid liengsuin (Run Way) kaba la don lypa kaba 571 meter, da kaba pynheh sha ka 2,400 meter. Kane kan pynsuk ruh ia ka jingpyniaid ia ki liengsuin A-320 type ha Shillong. Nalor kata, kane ka projek ka kynthup ia ka jingpynheh ia ka Terminal bad ka Apron, ryngkat bad ki kam pynroi bapher bapher. Katkum ka jingpynbna tender, ka jinglut jingsep jong kane ka projek ka long T.11,944.47 lak (T.119.44 klur), bad ka por ba la khmih lynti ban pyndep ka long 18 bnai.
U Myntri Rangbah ka Jylla Conrad K. Sangma u la ong “Kane ka dei ka khyllipmat jong ka jingsngewhun bad jingkyrmen kaba khraw na ka bynta ka Jylla Meghalaya. ki lad ki lynti na ka bynta ki samla jong ka Jylla namar hadien ba la dep, kane ka projek ka kyntiew ïa ka jingïadei bad ki kam jngohkai pyrthei ha ka jylla”.
U Myntri Rangbah u la shim khia halor kane ka kam bad ka Sorkar Pdeng ha ki kyrdan bapher bapher. Ia kane ka projek la shim kum u mawjam jong ka jingangnud jong ka Meghalaya ban mih kum ka jaka jngohkai pyrthei bad ka jaka kynshew tyngka kaba kongsan ha ka ri.
Ka AAI ka la aiti ia ka Draft Master Plan ban pynheh iaka liengsuin ha u bnai Nailar 2024 bad ka jingshim jaka na ka bynta ka jingpynheh kaba 22 akar kaba donkam na ka bynta katei ka projek ka la iaid shakhmat. Ka jingpynheh ia ka kad liengsuin jong ka Shillong la khmih lynti ba kan pynbha shibun ia ka jingiadei bad ki nongbah ha kylleng ka ri India, kaba plie lad ia ka jingwan jngohkai pyrthei kaba kham bun, ka jingleit jingwan jong ki kam khaii, bad ka jingpyniasoh lang ia ka Jylal bad kiwei pat ki Jylla ka Ri.
