SHILLONG, JAN 13: Ka Digital India Startup Hub lyngba ki Software Technology Park jong ka ri kan plie ia ka Centre of Excellence in Online Gaming kaba nyngkong jong ka ri ha nongbah Shillog shuwa u Lber 2023, la ong u Myntri Khynnah ka sorkar pdeng uba khmih ia ka Tnat Electronics & Information Technology and Skill Development & Entrepreneurship, u Rajeev Chandrasekhar.
La kyrmen ba ka Centre of Excellence ha Shillong kan kyntiew ia ki startup bad kiba treikam lajong na ka thain shatei lammihngi ban tei ia ka Gen Online Gaming ecosystem kaban wan.
“Kadei ka thong jong u Myntri Rangbah duh u Narendra Modi ba ka bynta kaba thymmai jong ki Startup bad ki nongseng kam lajong kadei ban long na Shillong, Kohima bad kiwei kiwei ki bynta jong ka thain shatei lammihngi jong ka ri,” la ong u Rajeev Chandrasekhar haba iakren bad ki lad pathai khubor ha ka jingialang ha nongbah Shillong.
Ka long kaba donkam ban kdew ba ka Tnat Electronics and IT (MeitY) dang shen ka la sam ia ki jingpynkylla ha ka Draft jong ka IT Rules 2021 ha kaba iadei bad ka Online Gaming na ka bynta ka jingiamir jingmut paidbah.
U Myntri u la ban ruh ia ka jingdonkam jong ka jingtbit ha ki kam digital hadien ka COVID, namar ka jingpynkylla digital ia ki mar, ki jingshakri bad ki tiar ka la bteng ban kiew ha kylleng ka pyrthei.
“Ka jingai jinghikai ha ki kam Digital iaki samla jong ka thain shatei lammihngi kan iarap ia ki ban iohkam iohjam bad ka jingseng kam lajong ha ka ioh ka kot lyngba ki kam digital kaba long ka jingngeit jong ka Sorkar u Narendra Modi” ong u Rajeev.
U Myntri u la pynbna sa kawei ka sienjam jong ka MeitY ban plie ia ka jaka kaba la biang lut katkum ka juk mynta hapoh ka National Institute of Electronics and IT (NIELIT) ban ai jinghikai ha ki kam digital ha nongbah Shillong bad la pynkhreh ia ka jaka kaba 10 akar na ka bynta kane ban pynbiang ia ka jingdonkam ai jinghikai jong ki samla ha ka thain shatei lammihngi.
U Myntri u la pyntip ruh ba ka Sorkar kala plie biang ia ka Skill India lyngba ka PMKVY 4.0, ka ban ai jinghikai ia kumba 50,000 ngut ki samla ha Meghalaya ha ki jingpyntbit katkum ka juk ban wan ha kaba don lad ban ioh kam ha ki kompani.
“U Myntri Rangbah duh u Narendra Modi u dang tei ia ka India kaba thymmai kaba don ki jingthmu ba thymmai bad ki jingangnud na ka bynta ki samla jong ka ri. Kine ki long ki kabu kiba bun ba don mynta bad kumta ki sap treikam ki long kiba donkam ban shimkabu ia kine ki lad” la ong u Myntri Sorkar.
Ha kaba iadei bad kiwei kiwei ki jylla ha ka thain shatei lammihngi, ka Tnat Skill Development & Entrepreneurship hapoh ka PMKVY4.0 kala buh thong ban ai jinghikai kumba 60,000 ngut ki samla ha Tripura bad 35,000 ngut ki samla ha Nagaland ha ki jinghikai kiba bun.
U Myntri u la wan jngoh ar sngi ia ka Jylla Meghalaya bad un leitphai noh sha Delhi mynta ka miet.
