Shillong, Jylliew 10: U Saleng A Sangma hynne ka sngi Nyngkong, ula ong ba hadien ka jingieh noh ia ka kam MLA ka Gambegre, shen un sa lum jingialang bad ki paidbah bad ki nongialam ka seng na ka bynta ban pynieng ia u kyrtong ha ka elekshon shiteng samoi na Gambegre.
Haba iakren bad ki nongpathai khubor u Saleng ula ong, ba hapoh ka 14 sngi naduh ka sngi kaba u jop iaka elekshon MP Lok Sabha, ula hap ban ieh noh ia ka kam MLA, kumta yn sa lum ia ki nongialam bad ki paidbah ban shim ia ka rai ban pynieng ia u kyrtong ha ka elekshon shiteng samoi na Gambegre Constituency.
Naba ka INDIA Bloc ka hap ban shong ha ka liang pyrshah, u Saleng ula ong, “Ngam tharai ba kane kan dei ka sien kaba nyngkong ia nga ba ngan don ha ka liang pyrshah. Nga lah don ha ka liang pyrshah baroh 5 snem kum u MLA khlem seng. Mynta ka kynti nga lah don ia ki paralok hapoh ka Parliament, kumta ka long kaba don jingmut ban don ha ka liang pyrshah”.
“(Kum a INDIA Bloc) ngi la pyni ia ka rong kaba shisha bad ia ka mynsiem jong ka jingsynshar paidbah kumta ngin iengskhem beit da ka jingiatylli bad ngin ym ngop ha kino kino ki jingpynbeij jong ka seng BJP ne NDA,” ula ong.
Ula ong ba kum u MP uba dang shu jop, yn shimkhia ha ka ban rah hapoh parliament ia ki ishu kiba dang sahteng jongka jylla kaba kynthup ia ka jingdawa ia ka Inner Line Permit (ILP), ban pynrung ia ka ktien Khasi bad Garo ha ka Eighth Schedule jong ka riti synshar ka ri, ban pyrshah jur ia ka Citizenship Amendment Act (CAA) bad kiwei kiwei.
Ula kynthoh ruh pyrshah ia ka MP barim ka Tura ka Agatha Sangma ba kam shym la kren tang shi kyntien ruh ha kaba iadei bad ka ILP hapoh ka Parliament.
“Ngi don ruh ia ki mat kiba iadei bad ka jingkyrduh kam kyrduh jam, ka pule puthi bad ka kam bamsap, khamtam eh ia ka ishu kaba iadei bad u drok kaba la sdang ban suhthied bha hapoh ka jylla bad kane kadei kaba donkam kyrkieh ban phaikhmat mardor” ong u Saleng.
“Kumba ka long mynta ka jingsynshar paidbah ka long kaba shngaiñ namar ba ka BJP kaba ialam ia ka NDA kam don than eh ia ka jingbun paid, kumta ka lad ka don bha ia ngi ka lad bad khamtam eh kin ym lah ban leh donbor shuh” ong u MP ka Tura.
U MP ka Congress ula ong ruh ba ka TMC bad kiwei pat ki seng sain pyrthei kim shym la kyrshan ia u ha ka elekshon Lok Sabha kaba dang shu dep.
“Ka TMC kam shym la kyrshan ia nga. Mano ba ong ia phi katta? Ki dei ki nongthep vote, nga iathuh ia phi ba kadei ruh ka jingdonbynta u Blei uba la kyrkhu ia nga. Klet ia ka TMC mano mano ruh ki lah ban kam hynrei kam mut pat ba ngim pdiang, ym shim la don kiba kyrshan ia ngi lait noh tang ki paidbah bad u Trai Kynrad” ong u Saleng.
Haba kylli la ka jingkyrshan ka BJP ka dei na kawei na ka daw jong ka jingjop elekshon, u Saleng ula jubab da kaba ong, “Em ki dei tang ki briew hi, ngam kwah ban ai nam ia kano kano ka seng, hynrei kidei ki paidbah bad ki nongialam balang”.
