Shillong, Iaiong 06: U Myntri ka sorkar jylla uba khmih ia ka tnad Disaster Management u Bah Kyrmen Shylla ula iathuh ba shen un sa lum ia ka jingialang na ka bynta ban iatai sani halor ki lad jingiada na ki jingpynjulor jong ka bor mariang.
U Bah Kyrmen Shylla ula ong, ba ha kine ki sngi ban wan, un sa khot iaka jingialang ha kaba yn donlang u Myntri Rangbah ka jylla u Conrad K Sangma bad ki heh ophisar sorkar na ka bynta ban shim ia ki sienjam bad ki lad ki lynti ban ialeh ban pynduna ïa ka jingjulor naka jingwan lyngshop ka bor mariang.
“Baroh ki tip ba ka Meghalaya kadei ka jylla ba jur slap bad la sakhi man u snem ia ka jingwan lyngshop ka bor mariang kaba la wanrah ia ka jingshlei um bad kiwei kiwei ki jingjia, kumta ngin sa pyrkhat bha ia kane, ha kine ki sngi ban wan bad ban wanrah syndon daka Action Plan” ong u bah Kyrmen.
Ula ong, na ka jingwan lyngshop ka bor mariang, ki jaka rep jaka riang kila shlei um bad kala wan ruh ka jingjia ba sngewsih ha kaba bun ki mynsiem briew ki la duh ei bad kumta ka long kaba kongsan ia ka sorkar ban thaw ia ki lad ki lynti ban shim ia ki lad jingiada.
U Myntri Sorkar ula ong ruh, ba ka tnad kala thaw ki lad ki lynti ban ai ka jingïarap sha kito ki lanot kiba mad ïa kane ka jingjia bad kan bteng ban ai da ka jingpynbna lyngba ki Deputy Commissioner jong ki district kiba don ha kylleng jong ka jylla Meghalaya.
