Shillong, Lber 13 : U Chief Executive Member (CEM) ka Khasi Hills Autonomous District Council (KHADC) Bah Pyniaid Sing Syiem ha ka sngi Balang ula kular ban sa khot ia ka jingialang jong baroh ki MDC hapoh ka artaiew, ban iakren halor ka kam ba iadei bad ka jingtih maw bad shyiap bad kiwei kiwei ki kam kamai jakpoh jong ki trai Jylla.
“Ngin sa khot ia ka jingialang jong baroh ki MDC ban iakren halor ka kam tih maw bad syiap” ong u Bah Pyniaid haba jubab ia ka motion bala wanrah da u Nongialam ka Liang Pyrshah Bah Titosstarwell Chyne halor ka kamai jakpoh jong ki paidbah ba sah hapoh u pud u sam ka Council hynne ka sngi kut jong ka Dorbar Mang tyngka.
U CEM ula ong ba ka jingphang ban tih maw bad tih syiap ka dei kaba la pynjari kat kum ka Meghalaya Minor Minerals Concession Rules, 2016. Hynrei u ong ba kane ka kam ka dei kaba hap ban iasyllok namar ki briew ki dang pyntrei beit ia kine ki kam ha ka por mynmiet wat hapdeng ka jingkhang pyrshah.
Kat kum ka jingong jong u, ka long kaba donkam ban phaidien biang sah ka rukom tih kaba ju leh mynshuwa.
Haba ban jur ia ka jingdonkam ban pynbiang tarajur hapdeng ka kamai jakpoh ki briew bad ka jingiada ia ka mariang, u Bah Pyniaid ula ong ba ka Council kan nym shah ban tih par ha ki catchment area.
Nalor kane, u CEM ula pyntip ba ka Council kan sa khot ruh ia ka jingialang bad ki Khlieh Nongsynshar jong ki Elaka bapher bapher halor ka jingdonkam ban wanrah noh da ka Policy ban ithuh ia ki jaka ki ban tih par.
“Ngi donkam ia ka policy ban ithuh ia ki jaka tih par ban tehlakam ia ka jingtih pathar khnang ba ngin lah ban pynbiang tarajur hapdeng ka kamai jakpoh bad ka jingiada ia ka mariang” ula ong haba pyntip ba ka council kan sa shong jingialang ruh bad ka Tnad Forest ka Jylla halor kane ka kam.
Ha kajuh ka por, u CEM ula ong ba ka Council kan ym lah ban pynhun ia baroh hynrei kan pyrshang ban shim ia ka rai ka ban ai jingmyntoi lang ia ki paidbah bad ia ka mariang.
