Imphal, Nohprah 07 :Ha kawei pat ka jingjop kaba ka Manipur Organic Mission Agency (MOMA) kala ioh pdiang, kane ka jylla kala lah ban shalan haduh 600 kilo u sohmynken king chilli ba tyrkhong shapoh United States.
Lah ban kdew ba kane ka dei ka bynta jong ka jingshalan sohmynken kaba haduh 1.1 metric ton napoh Manipur sha United States of America ia kaba la sdang naduh ka 5 tarik u Naiwieng 2022, bad ia kaba la pynbit pynbiang bad aijingkyrshan da ka MOMA bad ka Nahakpam Food and Beverages.
Kine ki sohmynken kiba khlem pyndonkam dawai ki dei kiba la pynmih da ki nongrep hapoh ka Mission Organic Value Chain Development for North Eastern Regions (MOVCD-NER).
Katkum ki khubor la ong ba une u 600 kilo u sohmynken ba khlem ai dawai u shongdor haduh kumba T.22 lak ha ki jaka iew ha ka pyrthei bad ia uba la lah ban pynmih lyngba 10 metrik ton u sohmynken im.
Ha kawei pat ka bynta, da ka jingpyrshang ban kyntiew bad pyniaid iew ia ki mar rep ba la pynmih napoh Arunachal Pradesh ha ki jaka iew ka pyrthei, ia u sohniamtra ba khlem pyndonkam dawai na Dambuk la sdang ban pyniaid iew hapoh Lulu Group’s Hypermarkets ha Dubai, UAE.
Ia kine ki sohniamtra la lah ban pyniaid iew hapoh Lulu Hypermarket Flagship Stores ha ka jingiadon lang ki heh sorkar na Arunachal Pradesh, kata kaba kynthup ia u Bidol Tayeng uba dei u Agriculture Production Commissioner cum Secretary (Agri.) ka sorkar Arunachal Pradesh, u Okit Palling, CEO ka Arunachal Pradesh Agriculture Marketing Board (APAMB), Tadu Game bad u Karbom Riram Director ka Agriculture Marketing bad Jt. Director Agriculture, ka kynhun na Lulu Hyper Market ba la mihkhmat da u K P Thamban, Regional Director, Lulu Group, Dubai, Regi MM, Senior Buyer-Imports, Santosh- Manager Purchase, hapoh Lulu Group International ha ka prokram kaba la long ha ka 1 tarik mynta u bnai ha Dubai.Ia kane ka prokram la khot pynlong da ka Arunachal Pradesh Agriculture Marketing Board ha ryngkat ka jingiatreilang bad ka Lulu Group International, Dubai.
Haba ai ka jingiaroh halor ki sienjam ba la shim da ka APAMB bad ka APEDA na ka liang u regional manager ka Lulu Group ula ong ba kane ka sienjam ka long u mawmer ka ban plie lad ia ki jaka iew na ka bynta ki mar rep bapher bapher kiba khlem pyndonkam dawai na ka jylla.Nalor kata ula ai khublei ruh ia ka jingtrei borbah jong ka Agriculture Marketing Board jong ka APAMB bad ka Lulu Group halor ka jinglah ban pynkhreh halor kane ka jingpynpoi ia kine ki mar tang ha i por iba khyndiat.
Haba kren ka prokram u Tayeng ula ai ka jingiaroh ia ka jingiatreilang jong ka APAMB bad ka Lulu halor ka jinglah ban pynlong ia kane ka prokram kaba jop bad ka ban plie lynti na ka bynta ban kyntiew ia ki kam khaii pateng.
Kumjuh na ka liang u Okit Palling, CEO, ka APAMB ha ka jingkren ula ong ba kine ki sohniamtra na Arunachal Pradesh ki dei kiba la pynmih da ka Dambuk Organic Orange Producer Company Limited, ia kaba la thaw hapoh jong ka MOVCD-NER.
