Pynlong ki Pulit ia ka jingtohkit kaba jur bha
Shillong, K’lyngkot 29 : Ki shynrong met ba sah (fossil) jong u mrad ba phylla jong ka juk Prehistoric, bala antad kumba 35-40 million snem, kala sahh tuh na ka shnong Tolegre, South Garo Hills District, kaba la pynbitar bad pynsngew bynniaw jur ia ka rukom ai pahara ia ka jaka ba lap ia une u mrad hapoh ka Jylla.
Kine ki shynrong met bas ah (fossil), la lap dang ha u bnai Jymmang 2024 da ka kynhun Geo Expedition hadien ka jingleit tih kaba neh palat shibnai. La ngeit ba kine ki shynrong met ki dei jong u mrad bala tip kum u Rodhocetus lane Ambulocetus- ki pateng hynrei jong u dohkha Whale ba mynta.
Ki stad wad bniah na ka Geological Survey of India (GSO) kila leit ban khmih ia kane ka jaka hynrei ki trai shnong kila shim ti halade ban pahara bad iada ia kane ka jingshem, kiba la pyrrkhing ruh ia ki nongwei ba kin ioh rung sha katei ka jaka.
Wat hapdeng ka jingpyrshang jong ki, dang shen kila don ba ot ia ki katto katne ki bynta jong ki dkhot met ba sah jong une u mrad.
U Myntri ka Tnad Pule Puthi Rakkam A Sangma bad MLA ka thain, ula pynthikna ia kane ka jingshah tuh, haba pyntip ba ki trai shnong kila leit ujor da ka ejahar sha ki Pulit ka Siju Police Station.
“Kane ka dei ka jingduh kaba khraw ia ka Jylla bad ka Ri. Ki Pulit ki dang tohkit bad nga kular ia phi ba ki briew ba donkti kin sa shah kem” ong u Rakkam haba iakren bad ki nongthoh khubor.
Ula iathuh ba ka Sorkar Jylla ka dang thmu ban ker bha ia kane ka jaka bad ban shna kum ka museum ban iada bad ban pyni pyrthei ia kine ki shynrong met ba sah jong une u mrad.
“Ka dei ka jingshem kaba pher bha. Ki stad Geology na shabar kila pyni ia ka jingthrang ban wan sha katei ka jaka bad kum u MLA ka thain, nga la tynruh ban shna iaka museum”.
Ki Nongshongshnong kila dep ker ia kane ka jaka ban iada ia kine ki jingshem hynrei kane ka jingshah tuh ka pyni ia ka jingtlot ka rukom pahara ha kane ka jaka kaba long khlaw ba padun.
“Ka jaka ba lap ia kine ki shynrong met ba sah ka don hapoh ka khlaw. Wat hapdeng ka jingpyrshang jong ki nongshongshnong, ki don kiba la leit rung tuh shapoh kane ka khlaw bad leh ia kane ka kam tuh” batai u Rakkam.
 jong u mrad ba phylla jong ka juk Prehistoric, bala antad kumba 35-40 million snem, kala sahh tuh na ka shnong Tolegre, South Garo Hills District, kaba la pynbitar bad pynsngew bynniaw jur ia ka rukom ai pahara ia ka jaka ba lap ia une u mrad hapoh ka Jylla.){kind=link}