Shillong, Lber 12 : Kawei ka kali Sorkar kala shah thang dusmon hynne ka step phyrngap, kaba pynieng harud surok hapoh ka thain Nongmensong.
Kane ka kali kadei ka Swift Dezire kaba don u nombor ML05-AB-1290 bad la pyntip ba ka dei ka kali ba pyndonkam ka BSNL.
Kat kum ka khubor Pulit, kane ka jingjia kala jia hapoh ka shnong Nongmensong Dongkadiang ha ka por 2:50 baje eiei. Kane ka kali kala julor na ki bynta ba shakhmat.
Ki Pulit ka Nongmensong kila kyrpad ia u Superintendent of Police ka East Khasi Hills ban iakren bad u Director ka Forensic Science Services, Meghalaya, Shillong ba kin phah ia ki stad ki jhad ba kin wan tohkit ia kane ka kali bad ban ai ia ki jingshem jong ki.
