Dibrugrah, Jymmang 26 : Lai ngut ki nongtih dewiong kila shah taplup ha ka jingkhynra jong ka par dewiong thliew khnai ha Patkai Hills, kaba don ha Eastern Assam, Tinsukia hynne ka step Sngi U Blei.
Napdeng kine kiba shah taplup, ki arngut kiba dei na Meghalaya ki dei kiba tip kyrteng kum u John bad u Fenaal katba uwei pat u dei na Nepal uba kyrteng u Dawa Cherpa ba na Bhujour, Nepal.
Kat kum ka khubor, kane ka jingjia kala jia hynne ka miet shiteng synnia por 12:30 hapoh ka Tikok West Mining site bala khein be-ain, kaba don hapdeng ka Bargoloi bad ka Namdang.
La iathuh ba 4 ngut ki nongtrei dewiong kila don ha kane ka krem thliew khnai ban tih tuh ia u dewiong.
“Lai ngut na ki, kila rung shapoh ka krem ban thep ia u dewiong katba uwei u don shabar ban tan ia u mar. Hynrei kynsan kynsan, kala mih ka jingtwa ka khyndew kaba la pynsahkut ia laingut ki nongtrei shapoh ka krem. La suba jur ba kine ki briew kila iap shapoh kane ka krem” ong ka khubor.
Ha kajuh ka por, ka jingia wad ia kine ki nongtih dewiong ka dang iaid shakhmat.
