Guwahati, Nohprah 20: U MLA ka Sivasagar u Akhil Gogoi hynnin ka sngi Nyngkong ula shah sospon napoh Assembly ha ka kynta buh jingkylli halor ka jingkynnoh wanrah ia ka mat kaba iadei bad ki kam pyntriem pyrshah ia ki kynthei ha ka jylla.
Une u nongmihkhmat na Sivasagar ula kwah ban buh ka jingkylli ha kaba iadei bad ki kam pyntriem pyrshah ia ki kynthei hadien ba u Lamphang ka iingdorbar ula khanglad ia u.
U Lamphang ka iingdorbar u Biswajit Daimary ula ong ha u Gogoi ba un buh ia ka jingkylli ha ka jaka ban aijingkren (lecture) bad sospon noh ia u napoh ka dorbar Assembly.
Katkum u Gogoi, ka Assam ka wan ha ka kyrdan kaba hakhmat eh napdeng ki jylla hapoh ka ri India kiba jur tam ki kam thombor pyrshah ia ki kynthei ha kaba haduh kumba 48 ngut ki kynthei kila shah leh beijot bad shah pyniap ha Assam.
“Man la ka sngi kila don ki jingshah pajuh ki jingdeng ksiar, ki jingshah leh beijot bad kiwei pat ki kam thombor ha ki sorbah kum ha Guwahati.Namar ka jingwanrah ia kane ka mat kaba kongsan Nga la shah sospon noh na ka iingdorbar assembly ka jylla,” pynpaw u Gogoi lyngba ka twitter.
Kham hashwa, kata h u bnai Nailur ba la dep, une u MLA ka Sivasagar ula shah sospon napoh Assembly ha ka por jong ki kynta buh jingkylli ha kaba la ialam noh ia u shabar jong ka iingdorbar da ki arngut ki bor pahara.
Haba u Gogoi ula buh jingkylli ha kaba iadei bad ka tnat pule puthi, u Lamphang ula khanglad ia kane ka jingkylli jong u bad hukum ban sospon ia u ha baroh ki kynja buh jingkylli hapoh ka iingdorbar.
