Silchar, Naiwieng 07 : U headmaster jong ka Radhamadhab Buniyadi School kaba don ha ki bynta jong ka Kanakpur ula shah sospon noh na ka kam ha ki bor ba dei khmih namar ka jingwanrah wait shapoh skul.
Une u nonghikai ia uba la tip kyrteng kum u Dhritimedha Das 38 snem rta u dei uba la hikai mynta lah palat 11 snem kynthih.U Das u dei u nongshong shnong jong ka thain Tarapur kaba hap hapoh Silchar district ka Assam.
Ka video kaba pyni ia une u headmaster uba rah da ka wait kaba jrong kala saphriang lyngba ki social media hadien ba ki bor pulit kila wan ban tuklar bad rah noh ia u.
Ki pulit ki iathuh ba ha kane ka sngi Saitjain ba la lah, kila ioh pdiang ia ka phone napoh ka skul Radhamadhab Buniyadi hadien ba kila wanpoi mardor ha kane ka jaka ban khmih ia ka jinglong jingman baroh.
“Une u nonghikai ula pyrshang ban buhrieh ia ka wait bad leh mynleh kum u bym bna ei ei.Hynrei ngi la dep ban sakhi ia ka jingsyier hapdeng ki khynnah skul lem bad kiwei pat ki nonghikai hadien ba ngi la rung hapoh skul,” ong u heh pulit.
Ki pulit ki iathuh ruh ba mar ia poi hapoh skul, kila kurup noh ia katei ka tiar bad kyntu ia ki bor ba dei khmih jong ka tnat pule puthi ba kin shim ia ki lad jingpynshitom pyrshah ia une u headmaster.
Watla ym pat lah ban tip thikna ia ka daw tynrai halor kane ka jingwanrah wait jong u Das shapoh skul, hynrei kane hi kala pynher syrngiew hapdeng ki nonghikai bad ki khynnah skul kumjuh.
Haba kren sha ki lad pathai khubor, u Deputy Inspector of Schools ka Cachar district, u Parvez Neehal Hazari ula ong ba une u headmaster ula bitar ia kiwei pat ki para nonghikai halor ki katto katne ki kynrum kynram. “Ki don 13 ngut ki nonghikai hapoh kane ka skul ha kaba ha ka jingshisha ka jingdonkam ka long tang hynniew ngut ki nonghikai.Une u head teacher ula pyrshang ban leh da kasno kano khnang ban lah ban pynbeit pat ia kane ka bynta,” ong u Hazari.
Katkum ki tyllong khubor, kam shym la don satia kano kano ka jingujor da ka tnat pule puthi lane da ki nonghikai, hynrei watla katta u Das ula ngat ha ka jingshah sospon na ka kam.Haduh mynta hi u Das ula kyntait ban kren ei ei halor kane ka bynta.
Watla katta ki pulit kila iathuh ba kila lapdien ia ki katto katne ki kot ki sla kiba pynsuba na jaka treikam jong u Das ia kaba ki dang pynlong ka jingtohkit.Katkum ki pulit kila ong ruh ba kila ioh kurup ia ka jingthoh ha kaba une u Headmaster ula kynnoh ia ki katto katne ki nonghikai lada jia kano kano pyrshah ia u.
Ym tang katta, ki pulit kila ioh ruh ban kurup ia kawei pat ka jingthoh ha kaba u Das ula pynpaw ba u kwah ban pyniap ia sawngut ki nonghikai.
