Shillong Lber 02: Uwei u nongshong shnong ha ka shnong Shella kaba don ha ka khappud bad ka ri Bangladesh ula shah siat ïap ha ki shipai Border Security Force ha ka miet jong ka Sngi Thohdieng.
U Superintendent of Police ka East Khasi Hills u Rituraj Ravi hynne ka sngi Saitjaiñ, ula iathuh ba une uba la khlad noh na ka jingshah siat iap ha ki BSF hynnin ka miet, la tip kyrteng kum u Arsen M Marak bad mynta ki dang leh ia ka Post Mortem ia ka met ka jongu.
Ula pyntip ba ki pulit haduh mynta kim shym la ioh pdiang ia kano kano ka ejahar hynrei kila sdang pat ban pynlong ia ka jingtohkit halor katei ka jingjia.
“Kala don ka jingiania hapdeng ka jongki bad ki BSF kila siat namar ba kila kam, ba kila shah thombor bad shah byrngem bad kila siat na ka bynta ban iada iala ka jingim. Ngi dang tohkit bniah halor kane mynta” ong u SP.
“Ngim pat ioh ban sngap ia ka jingpynpaw na ki nongshong shnong bad ngim pat ioh pdiang satia ruh ia kano kano ka ejahar bad kane kadei tang ka jingkren ka bym pat pura.
Namar ngi dang trei ia ka kam bad haba ngi la ioh ia ki jingtip kiba bniah, ngin sa rejistar ia ka ejahar halor katei ka jingjia” la pynkut u SP.
