Nongpoh, K’lyngkot 20 : U Rangbah Shnong ka shnong Maikhuli-kaba don ha khappud ka Assam, u Nicholas Marak, ula mynsaw na ka jingshah shoh ha ki briew na Assam, kaba lam sha ka jingiakhru kaba jur hapdeng ki nong Maikhuli bad ki nong Assam hynne ka janmiet sngi Ba-ar.
Kane ka jingkulmar kala mih na ka jingleit thung post elektrik ka Meghalaya Energy Corporation Limited (MeECL) ha ka shnong Maikhuli-ia kaba la mih ban pyrshah jur da ki nong Assam, kiba kam trai ia ka jaka.
Kat kum ka khubor, ki briew ka MeECL kila leit ban thung post elektrik marjan ka pung ha Maikhuli, kaba don hapdeng ka jingiakam trai ia u pud u sam hapdeng ka Maikhuli bad ka Assam. Lah iathuh ba ki briew na ka Shnong Bakrapara, Assam kila wan ban pynibor bad da ka jingiamih sa ki briew na Maikhuli, kala lam sha ka jingiakhru kaba jur.
La iathuh ba ki Pulit ka Assam ruh kila iadonlang ha kane ka por ba jia kane ka jingkular hynrei la kynnoh ba kila shu peit kai bad khlem leh eiei ban tem ia kane ka jingiashoh iadat.
Ki Pulit ka Meghalaya kiba dei na Pillangkata Police Outpost, mar ia ioh jingtip ia kane ka jingjia, kila hiar wut wut sha katei ka jaka ban tem ia u paidbah na baroh arliang.
Lah ban kdew ba dang shen, ka huri hura kala mih hapdeng ki nong Maikhuli bad Assam ha Maikhuli namar ka jingshah pyndap ki jingthoh jong ka skhim MGNREGA ha kawei ka jaka kaba don hajan ka pung ri dohkha jong ka Shnong.
Namar kane ka jingiakynduh, ki bor District kila thaw ia ka Peace Committee kaba la rai ba baroh arliang mamla ki dei ban nym pynthut ia ka jingwan ki kam pynroi ne ki jingtei hapoh ka thain.
