Nongstoin, Nailur 02 : Kawei ka samla ba 24 snem, kala shah rong ha ka umsaw jong ka wah Phod Kynthei, Nongstoin hynne ka sngi Nyngkong.
Kat kum ka khubor Pulit, kawei ka samla ba kyrteng ka Rilinda Symbei ba sah ha Nondein, kala leit saitjain bad 3 ngut kiwei pat hapoh ka wah Phod Kynthei.
La iathuh ba katba kine ki 4 ngut ki dang iasaitjain, u slap ula wan hap kynsan bad ula pynheh kynsan ia ka um.
Kine ki briew kila iohi ia ka jingkiew kynsan ka um bad mar mar kila pyrshang ban iaphet sha rynkew, hynrei ka kong Rilinda Symbei kala shah rong ha ka um kaba khlain bor katba 3 ngut kiwei pat kila lait jam sha ryngkew.
Ki Pulit ka Nongstoin Police Station haba ioh jingtip ia kane ka jingjia, kila hiar wut wut sha katei ka jaka bad ha ryngkat ki Pulit ka Fire & Emergency Service, kila pynlong ia ka jingwad kaba jur ia ka kong Rilinda hynrei dei ha ka por 4:30 baje janmiet ba kila lap noh ia ka metiap jong ka, kaba sahkut ha ki maw.
Ia ka metiap la pynkit noh sha Civil Hospital, Nongtoin ban pyndep ia ki jingdonkam baroh kat kum ki lynti ka Ain.
