Shillong, Rymphang 12 : Uwei u Nongkhaii droks ula ngat ha ka jingshah rahbor hynne ka sngi U Blei ha East Jaintia Hills hadien ba mih ka jingiapher jingmut bad ki Nongthied na ka jingbym iabeit ha ka dor ka mur jong u droks.
Ia une u Nongkhaii droks la ioh ban pyllait im da ki pulit kiba la kem noh ia u hadien ha ryngkat bad 6 ngut kiwei pat.
U Superintendent of Police ka East Jaintia Hills Jagpal Singh Dhanao ula pyntip ba ki Pulit kila ioh khubor ha ka por 3 baje janmiet ba uwei u briew ba kyrteng u Masoom Choudhury, ula shah rahbor ha ka kynhun ki 5-6 ngut ki runar, kiba shang da kawei ka local taxi ML-11-7172.
Ula ong ba mar ia ioh ia kane ka jingtip, ki Pulit ka District kila pynlong ia ka jingtohkit ban wad ia une u briew. U ong ba dei ha ka por 4:30 baje, ka kynhun na Khliehriat Police Station kila ioh ban pyllait im ia u bad kila ioh ban kem ia ki nongrahbor bad hadien la rah noh ia ki sha Khliehriat Police Station.
Une u Heh Pulit u pyntip ba ha ka jingtohkit, la lap ba une u nongshah rahbor u dei u nongkhaii droks uba la leit pynpoi ia u droks bala thep ha kawei ka synduk sabon sha kine ki 5-6 ngut ki briew, kiba la rajbor pynban ia u hadien ba kila pdiang ia u droks.
Kine ki nongrahbor kila dawa pisa ruh haduh T. 5 lak ban pyllait ia u, ong u Superintendent of Police.
U pyntip ba da ka jingialam lynti kine ki briew, ki Pulit kila ioh ban kurup ia ka synduk sabon na ka local taxi bad la kurup noh ia u drok ba khia 15 gram ha ka jingiadon ryngkat ki nongsakhi shimet. Ki Pulit kila kurup noh ia ka taxi bad 6 tylli ki mobile phone.
Kine ki briew ba rahbor ki kyrteng u Damewanhi Rymbai (28), Deibor Sutnga (31), Hilari Dkhar (24), Banjop Sukhlain (25), Wanmi Muksor (30), Deimon Shadap (29) bad Masoom Choudhary ban a Katigorah Noonnagar, Assam.
Ki Pulit kila register case ia kane ka jingjia ha Khliehriat Police Station bad ka jingtohkit mynta kala iaid shakhmat ban lapdien ia ki briew kiba donkti ha kaban phah rah ia une u droks.
