Nongpoh, Rymphang 13 : Haduh 40 ngut ki briew na ka Shnong Nongkhrah, Ri-Bhoi District kila kem pang kynsan kynsan da kaba prie bad pynhiar ha ka jingwan bam na ka Iingkhawai bad la suba jur ba ka jingpang jong ki ka lah ban dei na ka jingiabam ia ka dohsniang kaba khlem shet bha.
Kat kum ka jingtip ba iohlum, kane ka jingjia kala jia ha ka step jong ka 11 tarik u Rymphang (sngi saitjain) bad la iathuh ba kane ka jingprie iapynhiar jong ki briew kala jia hadien ka jingwan bam iingkhawai ha kawei ka Iing jong u para nong shnongshnong (Nongkhrah) ha ka miet 10 tarik Rymphang.
Ia kine ki briew la pynkit noh sha ki artylli ki jaka sumar kiba don ha Nongpoh-ka Bethany Outreach Hospital bad ka Civil Hospital, Nongpoh.
Uwei na ki Rangbah ba ngat ha kane ka jingpang, ula pyntip ba baroh kine kiba kem pang ki dei kiba wan na ka Iingkhawai ha katei ka Longiing.
Ki Doktor kila pyntip ba hadien ka jingpeit bniah la suba jur ba kane ka jingiaprie iapynhiar ki briew ka lah ban dei na ka jinglong bih ka bam (food poisoning) namar ki iabam ia ka jingbam kaba la kylla sniew. Kila ong ba ha ka jingkylli pyrthew la sngewthuh ba baroh kine ki briew kila ngat bih na ka dohsniang.
Ki bor ka tnad ka Koit ka Khiah lane District Medical and Health Officer ki la phah marmar ïa ka kynhun jong ki doctor ban leit wad bniah halor kane ka jingpang kaba la ban syndet ha katei ka shnong Nongkhrah bad ruh ban pyntikna ïa ka daw tynrai.
