Guwahati, Naiwieng 22 :Ha kawei na ki jingjia kaba la pynkhihwin ia ki nongshong shnong ha Merapani hapoh Golaghat district ka Assam uwei u khynnah uba dang pule ha ka klas I la kynnoh ba ula shah pynshitom da kaba tyngeh ha u headmaster jong ka skul ha ka jingjia kaba la jia ha ka 18 tarik mynta u bnai.
Une u khynnah la ong ba ula ngat ha ka jingmynsaw kaba jur hadien ka jingshah bom shah tied ha utei u headmaster jong ka skul Gomari Phuloni Primary School hapoh Merapani jong ka Golaghat district.
Utei u headmaster ia uba la tip kyrteng kum u Anil Bora la kynnoh ba ula thombor ia utei u khynnah uba kyrteng u Rupanta Rangan Bora uba dang pule ha ka klas I namar ka jingkynnoh leh dakaid ha ka por ba ka jingshim klas ka dang iaid shakhmat.
Hadien ba kane ka khubor kala sdang ban saphriang, na ka liang ki nongshong shnong kila pynpaw ka jingkhih bitar bad dawa ruh ban pynshitom da kaba tyngeh pyrshah ia utei u headmaster jong ka skul.
Lah ban kdew ba utei u khynnah u dang shu dep shah puid shen na ka jingshitom ha kine ki khyndiat sngi ba la dep, ha kaba u don hapdeng ka jingtlot.
Da kaba khmih halor kane ka jinglong ka jong u, une u headmaster la kynnoh ba ula pynshitom ia u kaba la pynkyndit ruh ia ki kmie ki kpa jong une u khynnah.Mynta une u khynnah ula sheptieng ban leit skul bad kwah ban shu shong noh hala iing, kata kumba la pnapw da ka kmie jong u ka Manisha Bora.
Hynnin ka sngi Nyngkong, ka kynhun ki nongshong shnong ha ryngkat ki kmie ki kpa jong utei u khynnah kila wan poi hapoh katei ka skul bad kynthoh tyngeh ia ka jingleh jong utei u headmaster.Hynrei, watla katta na ka liang une u headmaster u Anil Bora ula pdiang halor kane ka jingbakla hakhmat ki lad pathai khubor.
