Tura, Risaw 12 : Ka khubor ba shah ragged (thombor) u samla pule Naga ha North Eastern Hill University (NEHU)-Tura Campus kala dei ka khana kaba la pur kylleng ki jaka hynrei kaei kaba baroh ki kwah ban tip ka long kaei ka daw ba pynlong ia une u samla ban phet noh na Campus bad ujor ia ka ejahar ha Nagaland.
Ka Shlem kala ioh ban iakren ia bun ngut ki samla pule bad kala shem ia ki jingshisha kiba la jia ha kane ka jingthombor ba shiteng miet ia une u samla, kaba sngew shyrkhei bha.
Ka khubor ka iathuh ba une u samla pule, ba pule MBA ha ka Department of Agri Businsess Managament ha NEHU, ula shah patan na ka kamra na Arbella Boy’s Hostel kaba don ha Chasingre ha ka por 1-1:30 mynstep jong ka 8 tarik Risaw, 2023 bad la ialam ia u sha khrum iing.
Kane ka khrum kam shym la don bording satia bad kine ki nongthombor kila tbeh da ki torch light ia ka durkhmat jong une u samla, kaba pynlong ia u ban nym ithuh ia ki durkhmat kine ki briew hynrei u lap ba ki dei kiba nang bha ban kren Hindi.
Hadien kane, ula shah hukum ban rwai bad ban shad. Kiei kiei baroh ki dang biang kat haduh kane ka por hynrei hadien la kynnoh ba ula shah hukum ban law ki jain haduh da lyngkhuid beit ploin.
Namar ka jingsngew jah burom bad jinglehrain, une u samla ula phet bak na hostel bad ula leit beit beit sha Nagaland bad hangne ula ujor da ka ejahar sha ki Pulit.
Kane ka jingjia kala mih pyrthei hadien ba ka seng Mima Students’ Union (MSU) na Kohima, kala ujor pyrshah ia kane ka jingthombor ia une u samla.
U President ka MSU Meteiienuo Ngukha ula iakren ia kane ka kam bad ka Anhami Krotho kaba ha Shillong bad kyrpad ia kane ka seng ba kan tuklar bad shimkhia ia kane ka jingjia khnang ba une u samla un ioh ia ka jingbishar kaba hok.
Ha kajuh ka por, ka Naga Students’ Union (NSU) Shillong, kala thoh sha u Vice Chancellor ka NEHU Prof PS Shukla ba dawa ba un tuklar bad ban pynioh ia ka jingbishar kaba hok ia une u samla hapoh ka 24 kynta.
Ka kam thombor (ragging) ka dei ka kam bymman bad ba shah pynshitom hapoh India. Ka ain ka ong ba mano mano kiba leh ne iashimbynta ne iasuhbuit ban leh ia ka ragging la ka dei hapoh ne shabar ka jaka pule, ynda la pynngat ia ki, kin shah pynshitom da kaba set along kaba lah ban kot haduh 2 snem lane bad ka kuna kaba lah ban long shiphew hajar ne baroh ar.
La ong ruh ba lada ym lah ban ithuh ia ki briew kiba donkti, baroh ki briew kiba iadon bynta lane don lang, kin ngat ha ka jingpynsajia kat kum ka Ain.
Ha kajuh ka por, ki bor pyniaid ka NEHU ki dang ban pyllait ia ka kyrwoh halor kane ka jingjia.
Ki Pulit ka West Garo Hills ruh kila ioh jingtip ia kane ka jingjia hynrei namar ka jingbym don ba wan shakhmat ban ujor bad ki lane ba ki Pulit ka Nagaland kila pan ia ka jingiarap na ki, kumta kim pat shym la leh eiei satia halor kane ka jingjia.
