Shillong, Jymmang 25: U Superintendent of Police ka East Khasi Hills Bah Vivek Syiem ha ka Sngi Nyngkong, ula ong ba ki pulit kila sdang ia ka jingtohkit halor ka jingshah pynjulor ka kali jong u Pastor MacDonald Pyngrope bad ki pulit ki dang khmih bniah ruh la katei ka jingjia ka dei ne em kaba don bynta bad ka jingmih ka kynrum kynram hapoh ka iingmane jong ka Balang Presbyterian Mawkhar.
Kane ka jingjia kala jia ha ka miet jong ka Sngi u Blei.
“Hynnin ka sngi ha ka por 9:30 ngi lah ioh ia ka jingtip ba ka kali Bolero kaba lieh jong u Pastor MacDonald Pyngrope, kaba la pynieng ha ka surok ha Wahingdoh, kala shah pynjulor. Ka iit jong ka kali kala shah pynpait” la ong u Bah Syiem.
U Pastor ula ujor da ka ejahar ha Lumdiengjri Police Station.
“Halor katei, ula ujor da ka ejahar ha Lumdiengjri, ia kane la shim kum ka Zero FIR bad la pynkynriah noh ia ka sha ka Sardar Police Station,” la ong u Bah Syiem.
Ki pulit jongka Sardar Police Station kila sdang ia ka kam halor kane ka jingjia.
Ki pulit kila shimkhia ban ithuh noh ia kito kiba donkti halor katei bad ban lap ruh halor ka jingthmu ka jongki.
“Ki Pulit ki dang trei ia ka kam ban lap ia kine ki nongleh kam sniew bad ruh ban wad ia ka jingshisha la kine ki riewsniew ki don ia ka jingthmu ban tuh, namar ba kila don ki tiar ki tar hapoh jong ka kali ne ki don da kawei pat ka jingthmu” la ong u Bah Syiem.
Haba kylli la ka don kano kano ka jingiadei ha kaba iadei bad ka kynrum kynram kaba la mih hapoh ka iingmane, u Bah Syiem ula ong, “Hooid, kala don lypa ka kynrum kynram hapoh iingmane hynrei ngi ngin sa lah ban pynthikna tang hadien ba ngi lah tohkit ia kane ka jingjia, la kadei kaba don bynta eiei bad ka jingiashrut hapoh ka iingmane ne kadei thik tang ka kam ban tuh ban thiem ia ki jingdon jingem”.
Ula pynthikna ba u Pastor Pyngrope kham hashwa ula dep ban ujor ia ka ejahar.
“Hooid, udei ujuh hi u briew uba la ujor ia ka ejahar halor ka jingkynnoh bamsap hapoh jong ka iingamane” la ong u Bah Syiem.
Ha kaba iadei bad katei ka jingjia jong ka kam bamsap hapoh iingmane, u SP ula ong, “Ia ka jingjia kaba nyngkong lah dep ban chargesheet ha kaba la shem ba kala jah ka pisa haduh T.3 Klur. U Pastor ula ujor sa ia kawei ka ejahar ha kaba kala don ka jingpyndonkam bakla ia ka T.4 Klur. Ngi lah shimkhia ia kane ka kam bad ka iingkashari bad na ka liang jongka iingkashari kala ai ka jingbthah ia ngi ba kan iai bteng beit ia katei ka juh ka Case bad lada jia ba ka don kano kano ka jingjia kaba thymmai ne ki jinglap kiba mih, kumta kan iai bteng beit da kajuh hi ka jingtohkit”.
