Nongpoh, Nailar 25 : Kawei ka petrol pump ha shnong Umran Dairy, kala shah lute hynne ka step Sngi U Blei ha ka kynhun ki runar kiba la khung lut ploin ia ka pisa ba kot palat T 4 lak.
Kane ka jingjia kala jia ha ka por 5 baje mynstep, ong ki Pulit kiba iathuh ba ka pisa ba la rong tuh da kine ki runar kala kot haduh 4,24,614 nalor ki 3 tylli ki mobile phone.
Ki iathuh ba ha kane ka step, katba u Manager ka Pump u dang thmu ban plie ia ka pump, kynsan kynsan la wan mih saw ngut ki briew ki bym ithuh durkhmat, kila thombor bad patan ia u ha Ophis hashuwa bakin teh ia ki kti ki kjat. Ki iathuh ba ia ki nongtrei ruh kila thom bad teh.
La iathuh ba u Manager ula pyrshang ban iakhun ia kine ki runar hynrei ula shah ot da ki kynja tiar ba nep na ka kti.
Kat kum ka jingiathuh u Manager, ka pisa bala shah tuh ka dei ka pisa jong ka umphniang ba die ha ka 23 bad 24 tarik Nailar.
Ki Pulit ka Ri-Bhoi, haba ioh jingtip ia kane ka jingjia, kila hiar mar mar sha katei ka jaka ban pynlongia ka jingtohkit bad ban lum ia ki sakhi satar lyngba ki kor CCTV ban lapdien ia kine ki runar.
Ki Pulit kila register case ia ka jingjia bad ka jingtohkit mynta kala iaid shakhmat.
