Shillong, Rymphang 08: Ki kot ki sla jong ki 4 ngut ki kyrtong kila shah kyntait halor ka jingshem ba kim biang ha ka jingbishar ia ki kot ki sla thep kyrteng hynne ka sngi balang.
Napdeng kine, saw ngut ki dei ki kyrtong ka National People’s party (NPP) bad uwei u dei jong ka United Democratic Party (UDP). Kine ki saw ngut ki kynthup ia 3 ngut ki Shynrang bad kawei ka Kynthei.
“Saw tylli ki kot thep kyrteng la shem ba kim biang namar la khein ia ki kum ki dummy candidate ne ki kyrtong ba shu buh kai” ong u Chief Electoral Officer (CEO) FR Kharkongor.
Ki kyrtong kiba la shah kyntait ki dei u Bah Stoney Shylla jong ka UDP na Khliehriat Constituency, bad ki laingut ki kyrtong ka NPP ki dei u Ailad Bhoi na Jowai,West Jaintia Hills, Hambertus Nongtdu na Sutnga-Saipung bad kong Violet Lyngdoh na Khliehriat Constituency kiba dei na East Jaintia Hills.
U CEO ula ong ba ka jingbishar ia ki kot ki sla jong ki kyrtong kala iaid beit ha baroh 12 tylli ki District ka Jylla na ka bynta ki 60 tylli ki constituency ka Jylla.
“Shuwa ka jingbishar kyrteng, ki don haduh 379 ngut ki kyrtong ba thep kyrteng hynrei 375 la lap ba ki dei kiba biang ki kot ki sla bad kine ki kynthup ia 339 ngut ki kyrtong Shynrang bad 36 ngut ki Kyrtong Kynthei”.
U CEO ula pyntip ba ha West Jaintia Hills ki don 27 ngut ki kyrtong ha kaba 1 ula shah kyntait noh bad kitei ki kyrtong baroh 26 ngut kidei ki shynrang, ha East Jaintia Hills ki don 10 ngut bad na kine 3 ngut kila shah kyntait noh, ha kaba 8 ngut ki kidei ki kyrtong shynrang bad 2 ngut ki kyrtong kidei ki kynthei.
Ha Ri Bhoi ki don 28 ngut ki kyrtong shynrang bad 7 ngut ki kyrtong kynthei, ha East Khasi Hills ki don 102 ngut ki kyrtong shynrang bad 14 ngut ki kyrtong kynthei, ha Eastern West Khasi ki don 7 ngut ki kyrtong shynrang bad 2 ngut ki kyrtong kynthei.
Ha West Khasi Hills ki don 21 ngut ki kyrtong bad baroh kidei lut ki shynrang, ha South West Khasi Hills ki don 14 ngut ki kyrtong shynrang bad 2 ngut ki kyrtong kynthei.
Ha North Garo Hills ki don 24 ngut kiba dei lut ki kyrtong shynrang, ha East Garo Hills ki don 16 ngut ki kyrtong shynrang bad 2 ngut ki kyrtong kynthei, ha West Garo Hills ki don 65 ngut ki kyrtong shynrang bad 4 ngut ki kyrtong kynthei, ha South West Garo Hills ki don 12 ngut ki kyrtong shynrang bad 3 ngut ki kyrtong kynthei bad ha South Garo Hills ki don 16 ngut bad kitei ki kyrtong kidei lut ki shynrang.
Ki kyrtong kynthei kiban iakhun iaka elekshon MLA ha ka jylla mynta ka kynti ki don baroh 36 ngut katba 339 ngut kidei ki kyrtong shynrang.
Ka sngi khatduh ban weng ia ka kyrteng ban long kyrtong, ka dei ha ka 10 tarik Rymphang.
