Tura, Risaw10 : U MDC ba mynta ka GHADC ba mihkhmat ia ka Zikzak, ula shah kynnoh ha ka kynhun Social Media ba kyrteng ka Civil Society A’chik Welfare Organisation, ba ula ieh shiteng ia ka project shna surok bala bei tyngka da ka Sorkar Pdeng, kaba la wanrah ha ka jingsohsat ia ki paidbah ka South Garo Hills.
Une u MDC u dei u Akthar Ali (MDC shimet), uba la ioh ia ka project shna surok jong ka skhim PMGSY na Hulukona sha Gopinathkilla, kaba jngai kumba 4 Km eiei. Une u MDC ula ioh ia kane ka kam saw snem mynshuwa.
Ka signboard jong ka PMGSY kala pyni shai ia ki jingkhein jingdiah jong ka project bad ka kyrteng u contractor hynrei ka surok pat ka dei ka bym i long ban peit, kaba bun da ki thliew ki syar ba la dap da ka umslap.
Ka CSAWA kaba dei na Ampati kala kynnoh ba une u MDC ula shu ieh shiteng por ia kane ka project kaba dei ban pyniasoh ia bun tylli ki shnong kiba don marjan ka khappud bad ka Bangladesh.
Ka kynhun kala rai ban pan jingtip noh da ka RTI ban lap ba haduh katno la pyntrei ia kane ka project bad katno la pyllait ia ka pisa ne la sei da une u contractor uba la kylla long u riewsainpyrthei.
U President ka CSAWA Tryans ChM arak ula ong ba ki Khynnah ba leit skhim na ki shnong ba iaid lyngba kane ka surok, ki shaniah ha kane ka surok ha ka leit ka wan bad kumjuh ruh ki nongshongshnong kiba leit iew leit hat.
U ong ba ka jingpan jingtip lyngba ka RTI kan pynpeit mat ia ka Tnad ba kan pynthikna ba ki project ki dei ban long kiba la trei pyndep.
