Imphal, Jymmang 14 : U Myntri Rangbah ka Manipur N Biren Singh ula shah khot hajir ha ka Sorkar Pdeng namar ka jingmih ka jingkulmar ba jingiaumsnam kaba ishyrkhei hapoh ka Jylla.
Hynne ka sngi U Blei, u Myntri Rangbah ka Manipur Biren Singh lem bad katto katne ki Myntri ka Sorkar kila poi ha Nongbah Delhi.
U Biren Singh un hap batai ia u Myntri Rangbah Duh bad Myntri kam Pohiing halor ka jinglong jingman ba mynta hapoh ka Jylla haba phai shaka suk ka sain.
Ki Myntri Sorkar kiba la synran ia u Biren Singh sha Delhi ki dei u Th Biswajit, Th Basanta Kumar, Y khemchand bad u Govindas Konthoujam.
Ka President ka BJP ha Manipur ka A Sharda Devi ruh kala poi lang sha Delhi ban iashong jingialang.
Ka Manipur kumba long mynta kala sdang ban kynjah hadien ka jingkulmar kaba shyrkhei ha Jylla naduh ka 3 tarik u Jymmang.
Naduh ka 3 tarik, ka Manipur kala sakhi ia ki jingjia umsnam bad palat 50 ngut ki briew kila iap hapoh ka Jylla.
