Shillong, Jymmang 14 : Ki pulit ka Anti Narcotics Task Force (ANTF) ka East Khasi Hills, hynne ka janmiet sngi U Blei, kila ioh ban kem ia 4 ngut ki nongkhaii droks na ka thain Laitumkhrah bad la ioh kurup haduh 154.02 gram u heroin.
Kat kum ka jingpyntip u Superintendent of Police (Citi) Bah Vivek Syiem, ka ANTF kala iohkem ia kine ki briew na kawei ka Maruti Alto K10 ba don u nombor ML05-Q-1599 katba ki dang iaid ha surok marjan ka Nazareth Hospital.
U pyntip ba ia kine ki briew la kem ha ka por 3 baje janmiet bad ha ka jingtalasi ia ka kali, ka ANTF kala ioh ban kurup haduh 11 tylli ki synduk sabon kiba la thep ia u heroin uba khia 154.02 gram.
Ka ANTF kala ioh ruh ban kurup ia 4 tylli ki mobile phone bad ka pisa ba T. 63,400.
Ia kine ki briew la register case hapoh ka Laitumkhrah Police Station hapoh ki kyndon jong ka NDPS Act.
