Shillong, Naiwieng 08 : Ka Tnad Meghalaya Police, kala khot hajir ia ki Nongialam ka Federation of Khasi Jaintia & Garo People (FKJGP) uwei hadien uwei pat halor ka huri hura kaba mih na ka rally halor ka jingkyrduh kam, kaba la pynlong ha ka 28 tarik u Risaw 2022.
Ka Tnad Pulit kala register case ia ki Nongialam ka FKJGP hapoh Sadar Police Station bad ha Laitumkhrah Police Station halor ka jingshah shoh ki briew ba iaid ba ieng bad ka jingpynjulor ia ki kali da ki nongiaid rally ka FKJGP ha ki thain Police Bazaar, Malki bad Dhankheti.
Mynta da u Vice President bad u Chief Organising Secretary ka FKJGP kila shah khot hajir ha Sadar Police Station bad la pynngat ia ki ha kijuh ki case bala pynngat ia u General Secretary Bah Eldie N Lyngdoh bad ia u Senior Vice President Bah Elton Cliff Warjri.
Kiba shah khot hajir mynta ki dei u Vice President Bah Kitboklang Nongphlang bad u Chief Organising Secretary Bah Kharkupar Nongsiej.
Ia kine ki arngut la phah wan hajir ha ka 10 tarik u Naiwieng ha Sadar Police Station ha ka por 12 baje mynsngi.
