Shillong, Naitung 16 : Ka Tnad Meghalaya Police (MLP) kala shah buh jingkylli ba hato kam khein snep bad kam burom satia ia ka iktiar bad ka bor treikam jong kiwei pat ki tnad treikam ka Sorkar.
Kane ka jingkylli kala mih da ka jingkhot hajir ia ki Nongialam ka seng Federation of Khasi Jaintia & Garo People (FKJGP) ba khynra Licence bar Jylla dang shen ha ki thain Nongmensong.
Kane ka jingkhynra licence bar Jylla, ka dei kaba la pynlong da ka FKJGP ha ryngkat ka jingiadonlang ki Ophisar ka Khasi Hills Autonomous District Council (KHADC), ka Tnad Labour ka Sorkar Jylla lem bad ka Tnad Food & Safety ka Sorkar Jylla.
“Ka FKJGP ka lyngngoh ba kumno ka Tnad Pulit ka khot hajir tang ia ki nongialam ka Seng. Ngi khlem iaid lait ia ka District Council, ka Tnad Labour, ka Tnad Food & Safety. Ki Ophisar jong kine ki tnad kila iadonlang ha ka jingkhynra, hynrei shaei ki jah kine ki Ophisar (ba khlem khot hajir) lada ki (Pulit) ong ba ka jingleh jong ngi ka long kaba be-ain” ong u Bah Dundee C Khongsit, President ka FKJGP.
Kane ka jingkynthoh kala mih halor ka jingshah khot hajir u Chief Organiser ka Seng Bah Khrawkupar Nongsiej ha ki Pulit ka Nongmensong Police Station hynne ka sngi Ba-ar.
Ia u Bah Khrawkupar la synran da ki Nongialam ka Seng kynthup u President bad kiwei kiwei ki Nongialam ba hakhmat.
“Ngim sngew phylla ia kane ka jingleh ki Pulit bad ka Sorkar hynrei kaba sngew thamula ka long ba lada ngi pyrshang ban tehlakam ia kata ka jingwan rung be-ain ki bar jylla, pynban ka Sorkar ka iada bad pynsajia ia ki dkhot Sengbhalang da kane ka lynti” ong u bah Dundee.
Kat kum ka jingong jong u, ka Jylla Meghalaya kala don ia ka ain Inter-State Migrant Workmen Act, 1979 kaba la treikam naduh u snem 2011, kaba kren shai ba ki nongbylla bar jylla ki hap ban ioh ia ka work permit ban wan bylla ha Jylla.
“Ngim don jingpyrshah iaki bar jylla ba kin wan bylla lada ngim pat don ki briew jong ngi kiba lah ban trei ia ki kam ba kin trei. Ka seng ka pdiang lada ki wan shane ban leh ia ki kam kaba ki paradoh parasam jong ngi kim pat lah ban leh hynrei lada ki wan ki dang ban iaid pat kat kum ka ain” ong u bah Dundee
“Ka ain ka don ba tehlakam ia ki (nongbylla bar jylla) khnang ba kin ym lah ban long kynrad ha kane ka ri jong ngi bad ymlah ban rung ha ka electoral roll ba kin ioh ka lad ban jied nongmihkhmat ha ki constituency bapher bapher. Lada ngim lah ban tehlakam ia kane, kan long ka jingma ia ki pateng ki ban sa wan hadien 10-15 snem” ula bynrap.
Haba kylli, u Bah Dundee ula ong “Kane kam dei ka jingkut ia ngi ka seng hynrei nangne shakhmat baroh ki District, ki circle bad ki Unit kin nang pynjur ia ka jingkhynra Labour Licence ia ki nongbylla bar jylla hala ki jong ki jong ki jaka”.
“Kum ki samla kiba don jingkitkhlieh ia ka Jaidbynriew, ngim lah ban shu shong kli kti lad aka Sorkar kam leh eiei ruh em ia kane ka kam iap kam im jong ngi kum ka Jaidbynriew” ula ong.
, ka Tnad Labour ka Sorkar Jylla lem bad ka Tnad Food & Safety ka Sorkar Jylla.){kind=link}