Udalguri, Naitung 18 :Uwei u samla 22 snem rta u la shah kem noh ha ki bor pulit hapoh Udalguri district ka Assam hadien ka jingshah kynnoh donkti ha ka ba ai jingkyrshan ia ka kynhun seng lehnoh ULFA-I lyngba ka social media.
Ia une u samla la tip kyrteng kum u Pramod Kalita, u ba dang pule ha ka fourth semester hapoh Tangla College ha Udalguri district ka Assam. Une u samla u dei na ka shnong Borengabari ka ba hapoh Kalaigaon, Udalguri district.
U Pramod Kalita la kynnoh ba u la pynpaw ia kane ka jingai jingkyrshan na ka bynta ka seng lehnoh ULFA-I lyngba ka Facebook. Halor kane la rejistar case hapoh ki kyndon jong ka Unlawful Activities Prevention Act (UAPA).
Katkum ka FIR une u samla u la shah pynngat hapoh ki kyndon Section 120(B)/121 /121(A) RW Section 39 jong ka ain iakhun pyrshah lehnoh (UAPA).
“Une u samla u la pynpaw ka jingkyrshan ia ka kynhun kieng atiar ba la khein beain lyngba ka rynsan social media bad ngi la kem noh ia u bad wanlam hakhmat ka kashari ha Udalguri hynnin ka sngi U Blei,” ong u heh pulit u ba khmih ia ka jingtohkit.
